პუტინმა რუსები და უკრაინელები „ერთ ხალხად“ მოიხსენია

რუსეთის სახელმწიფო მაუწყებლის, ВГТРК-ის კორესპონდენტ პაველ ზარუბინთან ინტერვიუში ვლადიმერ პუტინმა დონალდ ტრამპის სპეციალურ წარმომადგენელ სტივ უიტკოფთან გამართული მოლაპარაკებების შესახებ პირველად ისაუბრა და რუსეთის პოზიცია წარმოადგინა.

პუტინმა განაცხადა, რომ რუსეთი აშშ-ის წარმომადგენლებს შეუთანხმდა, სამმხრივი მოლაპარაკებების განახლებისთვის მზად იყო. „ამ მოლაპარაკებების მიზანი იქნება, განვიხილოთ, როგორ უზრუნველვყოთ უკრაინისა და რუსეთის უსაფრთხოება სამშვიდობო შეთანხმებების მიღწევის შემდეგ, მათი საბოლოო სახით და არა საბრძოლო მოქმედებების შეჩერების შედეგად“, თქვა მან.

ზარუბინმა პუტინს უკრაინის პრეზიდენტ ვოლოდიმირ ზელენსკის განცხადებაზეც ჰკითხა. ზელენსკიმ Fox News-თან ინტერვიუში თქვა, რომ მზად იყო, კონფლიქტი შეხების ხაზზე გაეყინა და უკრაინის ტერიტორიის 75% შეენარჩუნებინა, ანუ, როგორც შეკითხვაში ითქვა, 25% დაეკარგა. პუტინმა უპასუხა, რომ ეს „მათი ტერიტორია არ არის, ეს ისტორიული რუსეთის ტერიტორიაა“.

პუტინი ამტკიცებდა, რომ ომი უკრაინას სურს და არა რუსეთს:

„ჩვენ უკრაინასთან ბრძოლა არ გვინდა. თუ უკრაინის ამჟამინდელ ხელმძღვანელობას ბრძოლა სურს, იბრძოლოს. მაგრამ რატომ ჰგონია, რომ ამისთვის ყველამ უნდა გადაიხადოს და იარაღი მიაწოდოს? […] ჩვენ კვლავ მზად ვართ მოლაპარაკებებისთვის და ამ რთული მდგომარეობიდან გამოსავლის მოსაძებნად. უკრაინელი ხალხი ჩვენთან ძალიან ახლოსაა. უახლესი გენეტიკური კვლევები აჩვენებს, რომ რუსები და უკრაინელები ერთი ხალხია“.

უცნობია, რომელ „უახლეს გენეტიკურ კვლევებს“ გულისხმობდა პუტინი.