Revolut-მა ყალბი სამთავრობო მოთხოვნით კლიენტების მონაცემები გასცა

გამჟღავნებულ მონაცემებს შორის პასპორტები, სელფები და ტრანზაქციების ისტორიაა. პასუხისმგებლობის საკუთარ თავზე ამღები პირები 10 000 ბიტკოინს ითხოვენ.

ბრიტანულმა ბანკმა Revolut-მა სენსიტიური ინფორმაცია გაამჟღავნა. ბანკმა ნამდვილი სამთავრობო უწყების ელფოსტის დომენიდან გაგზავნილი თაღლითური მოთხოვნები ნამდვილ მოთხოვნებად მიიჩნია.

Revolut-მა The Register-ისთვის მიწოდებულ განცხადებაში თავდასხმა დაადასტურა, თუმცა დაზარალებული კლიენტების რაოდენობა არ დაასახელა.

კომპანიას არც გამჟღავნებული მონაცემების ტიპები ჩამოუთვლია. თუმცა ბლოკჩეინის გამომძიებელმა ZachXBT-მ პარასკევს Revolut-ის შეტყობინებები გაავრცელა. მისი მტკიცებით, გამჟღავნებულ ინფორმაციაში კლიენტის იდენტიფიკაციის მონაცემებიც შედის.

გავრცელებული წერილების თანახმად, დაირღვა იმ დოკუმენტის კონფიდენციალურობა, რომელიც კლიენტებმა რეგისტრაციისას წარადგინეს. ეს პასპორტი ან მართვის მოწმობა იყო. ასევე გამჟღავნდა აპლიკაციის მეშვეობით გაგზავნილი დასადასტურებელი სელფი.

შეტყობინებებში გამჟღავნებულ მონაცემებად ასევე დასახელებულია ანგარიშის ამონაწერები, IBAN-ები, თანხის გატანის ჩანაწერები და ტრანზაქციების სრული ისტორია, მათ შორის, ბიტკოინის ტრანზაქციები. სხვა მონაცემებს შორისაა სრული სახელები, დაბადების თარიღები, საცხოვრებელი და ელფოსტის მისამართები, ტელეფონის ნომრები და პროფესიები.

ფინანსური ტექნოლოგიების კომპანიასთან დაახლოებული წყაროების თქმით, შემთხვევა კლიენტების მხოლოდ მცირე ნაწილს შეეხო. მათი თქმით, მიმდინარე გამოძიებები და კონფიდენციალურობის ვალდებულებები Revolut-ს დამატებითი დეტალების გასაჯაროების საშუალებას არ აძლევს.

Revolut-მა განაცხადა, რომ მონაცემები უნებართვო მესამე მხარეს გადასცა. ამ მხარემ მოთხოვნები ნამდვილი სამთავრობო უწყების ელფოსტის დომენიდან გაგზავნა.

კომპანიამ, რომელმაც გაერთიანებულ სამეფოში ბანკის ამოქმედების ნებართვა მარტში მიიღო, უწყება არ დაასახელა. თუმცა Revolut-ის თქმით, კომპანიამ შესაბამის ოფიციალურ პირებს აღმოჩენილი გარემოებების შესახებ აცნობა.

კომპანიის წარმომადგენელმა თქვა: „Revolut-მა ცოტა ხნის წინ დახვეწილი თაღლითური სქემა გამოავლინა. უნებართვო მესამე მხარემ ნამდვილი სამთავრობო უწყების დომენის ელფოსტა ინფორმაციის თაღლითურად მოთხოვნისთვის გამოიყენა“.

წარმომადგენელმა დასძინა: „აღმოჩენისთანავე მისამართი დავბლოკეთ და შესაბამის სამთავრობო უწყებას შევატყობინეთ. ასევე ვაცნობეთ სამართალდამცავ უწყებებს, მონაცემთა დაცვის ორგანოებსა და ფინანსურ მარეგულირებლებს. Revolut-ის სისტემებსა და კლიენტების თანხებს საფრთხე არ შეჰქმნია.