რუმინეთი შავ ზღვაში გემზე თავდასხმაში რუსეთს ადანაშაულებს

რუმინეთის პრეზიდენტმა ნიკუშორ დანმა რუსეთი შავ ზღვაში სავაჭრო გემზე პარასკევს დილით მომხდარ თავდასხმაში დაადანაშაულა.

დრონით თავდასხმის შედეგად სავაჭრო გემი ჩაიძირა. ბორტზე უკრაინისა და აზერბაიჯანის 13 წევრისგან შემდგარი ეკიპაჟი იმყოფებოდა, რუმინეთის ტერიტორიულ წყლებთან ახლოს.

დანმა განაცხადა, რომ თავდასხმის შედეგად სულ მცირე ერთი მეზღვაური დაიღუპა, სამი კი კვლავ დაკარგულად ითვლებოდა.

ეკიპაჟის 13 წევრიდან ცხრა გადაარჩინეს.

ითვლება, რომ ხომალდ „ხორივზე“ დრონით თავდასხმა რუმინეთის სანაპიროსთან ამ თვეში სავაჭრო გემზე თავდასხმის მეოთხე შემთხვევაა.

ორი კვირის წინ დასავლეთ შავ ზღვაში კიდევ ორ სავაჭრო გემს ცეცხლი წაუკიდა. ეს უკრაინისთვის მნიშვნელოვანი და ინტენსიურად გამოყენებული საზღვაო დერეფანია.

ერთ-ერთი გემი რუმინეთის ტერიტორიულ წყლებში იმყოფებოდა. რუმინეთმა შეშფოთება გამოთქვა რუსეთის შესაძლო პროვოკაციის გამო, ნატოს წევრი ქვეყნების საზღვართან ან მათ მიერ კონტროლირებულ წყლებში.

მსგავსი შეშფოთება გამოთქვა ბულგარეთმაც, რომელიც რუმინეთის მსგავსად ნატოს წევრია.

ამ თვის დასაწყისში ქვეყნის სანაპიროსთან სავაჭრო გემებზე დრონებით თავდასხმების შემდეგ, ბულგარეთმა რუსეთი შავ ზღვაში ქვეყნის განსაკუთრებული ეკონომიკური ზონის საზღვართან ზედმეტად მიახლოებაში დაადანაშაულა.

რუმინეთმაც და ბულგარეთმაც ნატოს შავ ზღვაში კომერციული გემების დაცვის გაძლიერებისკენ მოუწოდეს.

ნატოს ცნობით, ამ კვირის დასაწყისში ალიანსმა შავ ზღვაში დამატებითი საზღვაო საპატრულო თვითმფრინავებისა და რადარის სისტემების გაგზავნა დააანონსა. ალიანსს იქ მომხდარ თავდასხმებში არცერთი ქვეყანა არ დაუდანაშაულებია.

როიტერსის ცნობით, 15 ოქტომბრამდე 10 დღის განმავლობაში შავ ზღვაში მომხდარი ინციდენტების შედეგად დაახლოებით 23 მეზღვაური დაიღუპა ან უგზო-უკვლოდ დაიკარგა.

ევროკომისიის პრეზიდენტმა ურსულა ფონ დერ ლაიენმაც დაგმო ამ თვეში შავ ზღვაში გემებზე გახშირებული თავდასხმები. მან მიუღებელი უწოდა იმას, რომ „შავი ზღვა რუსეთ-უკრაინის ომის ესკალაციის კიდევ ერთ ფრონტად იქცა“.