რუმინეთის სანაპიროსთან გემზე სავარაუდო დრონებით თავდასხმა მოხდა

რუმინეთის სანაპიროსთან კიდევ ერთ სავაჭრო გემს, მედიის ცნობით, სავარაუდოდ დრონით დაესხნენ თავს. დაიღუპა სულ მცირე ერთი ადამიანი. რუმინეთის პრეზიდენტმა პასუხისმგებლობა კვლავ რუსეთს დააკისრა.

შავ ზღვაში, რუმინეთის სანაპიროდან რამდენიმე კილომეტრში, კიდევ ერთი სავაჭრო გემი სავარაუდო დრონით თავდასხმის სამიზნე გახდა. ამის შესახებ რამდენიმე რუმინულმა მედიასაშუალებამ ერთხმად გაავრცელა ინფორმაცია, საპორტო ქალაქ კონსტანცაში მდებარე საზღვაო უწყებაზე დაყრდნობით, რომელიც სამაშველო ოპერაციებზეა პასუხისმგებელი.

მედიის ცნობით, სავარაუდო თავდასხმა საპორტო ქალაქიდან დაახლოებით 13 საზღვაო მილის დაშორებით მოხდა, რუმინეთის ტერიტორიული წყლების ფარგლებს გარეთ. ეკიპაჟის ერთი წევრი დაიღუპა, ცხრა სხვა წევრის გადარჩენა კი მოხერხდა. კიდევ სამ დაკარგულ მეზღვაურს კვლავ ეძებენ. მომხდართან დაკავშირებით რუმინეთის შინაგან საქმეთა სამინისტრომაც გაავრცელა ინფორმაცია: უწყების ცნობით, გემს ჩაძირვა ემუქრება.

ეს ქვეყნის სანაპიროსთან გემებზე სავარაუდო დრონით თავდასხმის პირველი შემთხვევა არ არის. მხოლოდ ამ თვის დასაწყისიდან მოყოლებული, კიდევ სამ გემზე მსგავსი თავდასხმის შესახებ გავრცელდა ინფორმაცია. ბოლო დღეებში ბულგარეთის წყლებშიც რამდენიმე გემი დაზარალდა.

როგორც წინა სავარაუდო თავდასხმების შემთხვევაში, რუმინეთის პრეზიდენტმა ნიკუშორ დანმა პასუხისმგებლობა რუსეთს დააკისრა. დანმა საინფორმაციო სააგენტო მედიაфაქსთან (Mediafax) საუბრისას არ დაადასტურა, რომ დრონი რუსული იყო. თუმცა დანმა მომხდარს უკრაინის წინააღმდეგ ომთან დაკავშირებული „რუსეთის მორიგი ესკალაციის მცდელობა“ უწოდა.

ევროკომისიის პრეზიდენტმა ურსულა ფონ დერ ლაიენმაც მსგავსი განცხადება გააკეთა სოციალურ ქსელ იქსზე (X). მანაც „რუსეთის მხრიდან შავ ზღვაში მორიგ ესკალაციაზე“ ისაუბრა და მოსკოვი „საერთაშორისო სამართლის აშკარა დარღვევაში“ დაადანაშაულა.