რუმინეთის სანაპიროსთან ნავთობმზიდის ხანძრის შემდეგ შვიდ მეზღვაურს ეძებენ

რუმინელმა ოფიციალურმა პირებმა განაცხადეს, რომ ღამით ცეცხლი ორ ნავთობმზიდს გაუჩნდა. მანამდე რუსეთის დრონები რუმინეთის საჰაერო სივრცეში შეიჭრნენ.

ოფიციალურ პირებს გემებზე გაჩენილი ხანძრები რუსეთის დრონებთან პირდაპირ არ დაუკავშირებიათ.

ბოლო 10 დღის განმავლობაში რუმინეთისა და მეზობელი ბულგარეთის სანაპიროებთან დრონები სულ მცირე ხუთ სხვა სატვირთო გემს დაესხნენ თავს. ბულგარეთიც ნატოს წევრია.

ამ თავდასხმების შედეგად სულ მცირე 23 მეზღვაური დაიკარგა.

წინა თავდასხმები, ბოლო შემთხვევებისგან განსხვავებით, ნატოს ტერიტორიული წყლების საზღვრებს მიღმა მოხდა.

ორივე გემი შავ ზღვაში, მდინარე დუნაიზე გამავალი არხის შესართავთან იდგა ღუზაზე.

ეს არხი მნიშვნელოვანი სანაოსნო მარშრუტია, რომელსაც უკრაინა იყენებს, რადგან რუსეთი უკრაინის შავი ზღვის პორტებს უტევს.

რუმინეთის საზღვაო უწყებამ განაცხადა, რომ სან-მარინოს დროშით მცურავი ნავთობმზიდი Wine Trader-ისგან საგანგებო შეტყობინება მიიღო.

გემის ეკიპაჟის 12 წევრიდან შვიდი დაკარგულად ითვლება, ხოლო ხუთი გადაარჩინეს.

შინაგან საქმეთა სამინისტრომ განაცხადა, რომ სამძებრო-სამაშველო ოპერაციაში ორი Black Hawk-ის ვერტმფრენი გაგზავნა. მან ასევე გაგზავნა ორი გემი, რომელთა ბორტზეც სამედიცინო პერსონალია.

სამინისტრომ განცხადებაში აღნიშნა: „ამჟამად, ძალიან დიდი ტალღების გამო, სამაშველო ოპერაციის უსაფრთხოდ ჩატარება შეუძლებელია“.

კომორის კუნძულების დროშით მცურავ ქიმიურ და ნავთობმზიდ Yara J-საც ოთხშაბათს, გვიან საღამოს, ცეცხლი გაუჩნდა.

რუმინეთის ხელისუფლებამ თავდაპირველად განაცხადა, რომ გაურკვეველი იყო, თავს დაესხნენ თუ არა გემს.

Wine Trader-სა და Yara J-ს ცეცხლი მდინარე დუნაის სულინის არხის შესართავთან გაუჩნდათ. არხი შავ ზღვაში გადის.

ამ ადგილას გემები ხშირად ღუზაზე დგებიან და გავლას ელოდებიან, რადგან ამინდი და გადატვირთული მოძრაობა შეფერხებებს იწვევს.

რუმინეთს უკრაინასთან 614-კილომეტრიანი (381-მილიანი) საზღვარი აქვს, რომლის დიდი ნაწილიც დუნაის მიუყვება.

რუმინეთი ბოლო ოთხი წლის განმავლობაში არაერთხელ იტყობინებოდა, რომ რუსეთის დრონებმა მისი საჰაერო სივრცე დაარღვიეს.

ბოლო თვეებში რუსეთ-უკრაინის ომთან დაკავშირებული თავდასხმები შავი ზღვის გემებზე გახშირდა. ამან შესაძლოა გლობალური სასურსათო კრიზისი გამოიწვიოს.