რუსეთი აშშ-სა და უკრაინასთან სამმხრივი შეხვედრის გაგრძელებას დათანხმდა

აშშ-ის სპეციალური წარმომადგენელი სტივ უიტკოფი ოსლოში უკრაინის დასავლელ პარტნიორებს ვლადიმერ პუტინთან გამართული მოლაპარაკებების შესახებ ინფორმაციას მიაწვდის. თუმცა, ცნობების თანახმად, შეხვედრების ერთი შედეგი უკვე ცნობილია: რუსეთი მზადაა, აშშ-სა და უკრაინასთან სამმხრივი მოლაპარაკებები გააგრძელოს. ამას მოსკოვიც და ვაშინგტონიც ადასტურებენ.

კრემლის ცნობით, პრეზიდენტმა ვლადიმერ პუტინმა სანქტ-პეტერბურგში აშშ-ის სპეციალურ წარმომადგენელ უიტკოფთან შეხვედრისას ვაშინგტონსა და კიევთან ახალი სამმხრივი მოლაპარაკებების გამართვის მზადყოფნა გამოხატა. პუტინის მრჩეველმა იური უშაკოვმა თქვა, რომ ევროპელებისა და უკრაინის წინადადებები, რომლებიც უიტკოფმა გადასცა, „დიდად შინაარსიანი არ არის“. თუმცა, მოსკოვი „პრინციპში“ მზადაა, ნოემბრის შუა რიცხვებში უკრაინასა და აშშ-სთან მოლაპარაკებები განაახლოს.

თეთრმა სახლმა დაადასტურა, რომ კიევი და მოსკოვი ამ ფორმატში ტექნიკურ დონეზე კიდევ ერთი შეხვედრის წინადადებას დათანხმდნენ. უკრაინის პრეზიდენტმა ვოლოდიმირ ზელენსკიმ აშშ-ის ტელეარხ Fox News-თან ინტერვიუში ასევე მიანიშნა, რომ მზადაა, ფრონტის ხაზი გაყინოს.

პუტინის მრჩევლის, უშაკოვის თქმით, ოთხნახევარი წელია მიმდინარე უკრაინის ომის ფონზე, მოლაპარაკებებზე „მთავარი თემა“ უნდა განიხილონ. მისი თქმით, „თემა რუსეთისა და უკრაინის უსაფრთხოების სისტემის შექმნას ეხება“. შესაძლო ვადად მან 10 ნოემბრის შემდეგი პერიოდი დაასახელა, შეხვედრის ადგილად კი აბუ-დაბი მოიხსენია.

აშშ-ის, რუსეთისა და უკრაინის სამმხრივ ფორმატში ბოლოს თებერვალში, ჟენევაში გაიმართა მოლაპარაკებები. მანამდე კი არაბთა გაერთიანებულ საამიროებში, აბუ-დაბიში, ორი შეხვედრა ჩატარდა.

სამშაბათს ოსლოში უკრაინელებსა და ევროპელებთან შეხვედრების შემდეგ, უიტკოფმა დილით პუტინს უკრაინის წინააღმდეგ რუსეთის აგრესიული ომის დასრულების ახალი წინადადებები გადასცა. კრემლის ცნობით, სანქტ-პეტერბურგში, კონსტანტინეს სასახლეში, შეხვედრა სამ საათს გაგრძელდა.

პუტინის მრჩეველმა უშაკოვმა თქვა, რომ უიტკოფის ცნობით, „ევროპელებსა და კიევს რამდენიმე ახალი მიდგომა აქვთ“. მან დასძინა: „მაგრამ ეს ნიუანსები, ასე ვთქვათ, ბოლომდე არ გვაკმაყოფილებს“.

უშაკოვს შეცვლილი პოზიციების შესახებ დეტალები არ დაუსახელებია. კითხვაზე, რამდენად ახლოსაა ომის დასრულება, მან უპასუხა: „არ ვიცი, რამდენად მივუახლოვდით ამას, მაგრამ ამ მიმართულებით მივდივართ“.

შეხვედრის დასაწყისში პუტინმა აშშ-ის მოქალაქის გათავისუფლება გამოაცხადა. მას 2024 წელს ხანგრძლივი პატიმრობა მიუსაჯეს, რადგან, სავარაუდოდ, დაქირავებულ მებრძოლად უკრაინის შეიარაღებული ძალების მხარეს რუსეთის ჯარების წინააღმდეგ იბრძოდა. პრეზიდენტის თქმით, სტივენ ჰაბარდი სანქტ-პეტერბურგის პულკოვოს აეროპორტში უკვე იმყოფებოდა. უიტკოფმა პუტინს 70 წელს გადაცილებული ჰაბარდის გათავისუფლებისთვის მადლობა გადაუხადა. მისი თქმით, ჰაბარდის ოჯახი და ამერიკელები ამ ამბით გახარებული იყვნენ.