რუსეთის დარტყმებს კიევში ერთი ადამიანი ემსხვერპლა, 20-ზე მეტი დაშავდა

რუსეთის ძალები კიევს 22 ოქტომბრის ღამეს დრონებითა და ბალისტიკური რაკეტებით დაესხნენ თავს.

უკრაინის საგანგებო სიტუაციების სახელმწიფო სამსახურის ცნობით, დნიპროვსკის რაიონში დარტყმებმა საცხოვრებელი სახლები და მანქანები დააზიანა, საცხოვრებელ და არასაცხოვრებელ შენობებში კი ხანძარი გააჩინა. ერთი ადამიანი დაიღუპა, ხუთი კი, მათ შორის ბავშვი, დაშავდა. დარნიცკის რაიონში დარტყმებმა სატრანსპორტო ინფრასტრუქტურა დააზიანა.

ობოლონსკის რაიონში ორი ადამიანი დაშავდა. პეჩერსკის რაიონში დაშავდა რვა ადამიანი, მათ შორის სამი ბავშვი. ჰოლოსიივსკის რაიონში ექვსი ადამიანი დაშავდა. დარტყმებმა ასევე დააზიანა არასაცხოვრებელი შენობები, სასწრაფო დახმარების მანქანები და მონასტერი.

კიევის მერმა ვიტალი კლიჩკომ განაცხადა, რომ დარტყმებმა სამხრეთის ხიდთან მეტროს ინფრასტრუქტურის ნაწილი დააზიანა. დამატებითი დეტალები მას არ გაუვრცელებია.

რუსეთის თავდაცვის სამინისტრომ განაცხადა, რომ კიევზე დარტყმების სამიზნე იყო „უკრაინის სამხედრო-სამრეწველო ობიექტები, რომლებიც შორი და საშუალო მოქმედების ფრთოსანი რაკეტებისა და დრონების წარმოებასა და შენახვაში მონაწილეობენ, ასევე სატრანსპორტო ინფრასტრუქტურის ობიექტები“.

უკრაინის საზოგადოებრივი მაუწყებლის, Suspilne-ის ცნობით, რუსეთის ძალებმა ოდესის ოლქში საკვების საწარმოო ობიექტს დაარტყეს. ხანძარმა ადმინისტრაციული შენობა გაანადგურა. არავინ დაშავებულა.

რუსეთის თავდაცვის სამინისტრომ განაცხადა, რომ დარტყმების სამიზნე იყო „ოდესის ოლქის საპორტო ინფრასტრუქტურის ობიექტები და გემები, რომლებსაც უკრაინის შეიარაღებული ძალების ინტერესებისთვის იყენებენ“.

რუსეთი კიევს ყოველდღიურად დრონებითა და სხვადასხვა ტიპის რაკეტებით უტევს. 22 ოქტომბრის თავდასხმა აშშ-ის პრეზიდენტის წარმომადგენლის, სტივ უიტკოფის, სანქტ-პეტერბურგში ვლადიმერ პუტინთან შესახვედრად ჩასვლიდან რამდენიმე საათში მოხდა. მოლაპარაკებები რუსეთსა და უკრაინას შორის ომის დასრულებას ეხებოდა.