საუდის არაბეთის აეროპორტზე თავდასხმას ადამიანები ემსხვერპლნენ

იემენელი ჰუსიტები საუდის არაბეთში სამოქალაქო ობიექტებს არაერთხელ ესხმიან თავს. ახლა დამანის აეროპორტზე თავდასხმის შედეგად დაშავებულებისა და ორი დაღუპულის შესახებ გავრცელდა ინფორმაცია. აშშ-მა განაცხადა, რომ დიპლომატიური პერსონალის ნაწილს გაიყვანს.

საუდის არაბეთის ხელისუფლების ცნობით, ქვეყნის ერთ-ერთ აეროპორტზე თავდასხმის შედეგად რვა ადამიანი დაშავდა, ორი კი დაიღუპა. საუდის არაბეთის სამოქალაქო ავიაციის უწყების ცნობით, სპარსეთის ყურის სანაპიროზე, ქვეყნის აღმოსავლეთში მდებარე დამანის აეროპორტი დაზიანდა. ღამით დამანის მიმართულებით მიმავალი რეისები სხვა აეროპორტებში გადაამისამართეს, თუმცა აეროპორტმა მუშაობა უკვე განაახლა. საუდის არაბეთის მეთაურობით მოქმედი სამხედრო კოალიციის ცნობით, რეგიონში დრონებით ოთხი თავდასხმა მოიგერიეს.

ირანის მიერ მხარდაჭერილ ჰუსიტებს თავდასხმაზე კომენტარი ჯერ არ გაუკეთებიათ. თუმცა ჰუსიტების დაჯგუფება ამ აეროპორტს წარსულშიც მასშტაბურად დაესხა თავს.

სახელმწიფო საინფორმაციო სააგენტო SPA-ის ცნობით, ოთხშაბათს საუდის არაბეთში კიდევ ერთი თავდასხმის შედეგად ორი ადამიანი დაიღუპა, მათ ჩამოგდებული ჰუსიტური დრონის ნამსხვრევები დაეცა. საჰაერო თავდაცვამ დრონი ჩამოაგდო, როცა ის სახელმწიფო კომპანია არამკოს ნავთობის საბადო შაიბასკენ მიფრინავდა.

მემკვიდრე პრინცი მოჰამედ ბინ სალმანი საუდის არაბეთის გახსნას ცდილობს. თუმცა ჰუსიტების თავდასხმები ქვეყნის იმიჯს აზიანებს.

შიიტი ჰუსიტები იემენიდან მეზობელ საუდის არაბეთს ბოლო დროს არაერთხელ დაესხნენ თავს დრონებით, რაკეტებითა და ფრთოსანი რაკეტებით. თავდასხმებს მოჰყვა დაღუპულები და დაშავებულები, მათ შორის დედაქალაქ ერ-რიადის აეროპორტშიც. საუდის არაბეთი, თავის მხრივ, იემენის საერთაშორისოდ აღიარებულ მთავრობას უჭერს მხარს და იქ ჰუსიტებს ესხმის თავს.

აშშ-მა საუდის არაბეთიდან დიპლომატიური პერსონალის ნაწილის გაყვანა უკვე ბრძანა. გადაწყვეტილება ეხება აშშ-ის მთავრობის თანამშრომლებს, რომელთა იქ ყოფნაც აუცილებელი არ არის, და მათ ოჯახის წევრებს. აშშ-ის სახელმწიფო დეპარტამენტის პრესსპიკერმა ტომი პიგოტმა ეს ნაბიჯი ჰუსიტების დაჯგუფების მხრიდან სამოქალაქო ობიექტებზე გახშირებული თავდასხმებით ახსნა.