Stack Overflow-ის კვლევით, დეველოპერები AI-ს ხშირად იყენებენ, თუმცა არ ენდობიან

კვლევაში 169 ქვეყნიდან 30 903 დეველოპერი და ტექნოლოგიური სფეროს სპეციალისტი მონაწილეობდა. დროის გამოყენების შესახებ კითხვას ხელოვნური ინტელექტის 10 926-მა ყოველდღიურმა მომხმარებელმა უპასუხა. მათგან დაახლოებით 80%-მა განაცხადა, რომ ამ ხელსაწყოებს დღეში სულ მცირე ერთი საათით იყენებდა.

დეველოპერების კითხვა-პასუხის ვებსაიტ Stack Overflow-ის კვლევამ ისიც აჩვენა, რომ დეველოპერები სამუშაოში ხელოვნური ინტელექტის გამოყენებას სკეპტიკურად ეკიდებიან. დეველოპერების მხოლოდ დაახლოებით 7%-მა თქვა, რომ მნიშვნელოვან სამუშაო გადაწყვეტილებებში ხელოვნური ინტელექტის შედეგებს ენდობოდა. 48% მათ მაშინ ენდობოდა, როცა შედეგის გადამოწმება მარტივად შეეძლო. ხელოვნური ინტელექტის მიერ შექმნილი ტექნიკური პასუხის სანდოობის შეფასებისას 79%-ს წყაროს მითითება მნიშვნელოვნად ან ძალიან მნიშვნელოვნად მიაჩნდა.

Stack Overflow-ის აღმასრულებელმა დირექტორმა პრაშანთ ჩანდრასეკარმა (Prashanth Chandrasekar) განაცხადა, რომ დეველოპერები, როგორც ჯგუფი, ძლიერ სკეპტიკურები იყვნენ. მან თქვა: „რადგან ხელოვნური ინტელექტის აგენტები სწრაფად იძენენ მეტ ავტონომიურობას, ეს სკეპტიციზმი ახლა უსაფრთხოების უმნიშვნელოვანეს გარანტიად გვევლინება. რაც უფრო მეტ საქმეს ასრულებენ აგენტები, მით მეტად სჭირდებათ დეველოპერებს იცოდნენ, საიდან მოვიდა პასუხი და რა კონტექსტს დაეყრდნო შექმნილი ინფორმაცია ან მიღებული გადაწყვეტილება. ყველაზე მნიშვნელოვანი კი ისაა, რომ მათ რეალურად შეეძლოთ მისი სიზუსტისა და შესაბამისობის გადამოწმება. დეველოპერების ნდობა წინასწარ გარანტირებული არ არის. მას გამჭვირვალობით, წყაროს მითითებითა და მდიდარი ტექნიკური კონტექსტით იმსახურებენ“.

კვლევის თანახმად, გამოკითხულთა 66% კოდის წერის დამხმარეებს ან აგენტებს იყენებს, 63% ზოგადი დანიშნულების სასაუბრო ხელსაწყოებს, ხოლო 26% აგენტების ავტომატიზებულ სამუშაო პროცესებს. გამოკითხულთა 17%-მა თქვა, რომ ხელოვნური ინტელექტის ხელსაწყოებს არ იყენებდა.

Stack Overflow-ის კომერციულმა ურთიერთობებმა ხელოვნური ინტელექტის კომპანიებთან უთანხმოება გამოიწვია. კომპანიამ 2024 წლის დასაწყისში OverflowAPI წარადგინა. ის კითხვა-პასუხის შინაარსზე ფასიან წვდომას სთავაზობდა და მონაწილე პროვაიდერებს პასუხების შესაბამის პოსტებთან დაკავშირებას ავალდებულებდა.

რამდენიმე თვის შემდეგ მომხმარებლები OpenAI-სთან პარტნიორობას დაუპირისპირდნენ. შეთანხმება დიდი ენობრივი მოდელების შემქმნელს მომხმარებელთა 15 წლის განმავლობაში დაგროვებული მასალებით მოდელების გაწვრთნის უფლებას აძლევდა. შეთანხმებით, კითხვა-პასუხის ვებსაიტს OpenAI-ის ტექნოლოგიაზე წვდომაც უნდა მიეღო. რამდენიმე მომხმარებელმა თქვა, რომ ერჩივნა, საკუთარი პოსტები წაეშალა და რეპუტაციის ქულები დაეკარგა, ვიდრე მათი მასალები OpenAI-ის მოდელების გასაწვრთნელად გამოეყენებინათ.