ტრამპი ირანზე „ყველა ბომბის დედის“ ჩამოგდებით იმუქრება

გეგმების შესახებ ინფორმირებულმა ამერიკელმა ოფიციალურმა პირებმა სი-ენ-ენს (CNN) განუცხადეს, რომ სამხედროები GBU-43/B ტიპის ძლიერი ფუგასური ბომბის, MOAB-ის, გამოსაყენებლად ემზადებოდნენ. ეს ირანთან კონფლიქტის მნიშვნელოვან გამწვავებას გამოიწვევდა.

MOAB აშშ-ის არსენალში ყველაზე დიდი არაბირთვული იარაღია. თუმცა, სი-ენ-ენის ცნობით, საეჭვოა, რამდენად ეფექტიანი იქნებოდა მისი გამოყენება პრეზიდენტის მიზნების მისაღწევად.

ახლო აღმოსავლეთში კონფლიქტი თებერვალში აშშ-ისა და ისრაელის თავდასხმებით დაიწყო. ივნისში ომის დასრულების შესახებ დროებითი შეთანხმების ჩაშლის შემდეგ კონფლიქტი ჩიხში შევიდა.

პრეზიდენტი ტრამპი ცდილობდა, ირანს ბირთვულ იარაღზე წვდომა არასდროს მიეღო. თუმცა, რვა თვის შემდეგ ირანს სასიცოცხლოდ მნიშვნელოვან ჰორმუზის სრუტეზე უპრეცედენტო გავლენა აქვს. ამასთან, ნოემბრის შუალედური არჩევნების წინ ტრამპის პოპულარობა ქვეყანაში იკლებს.

სი-ენ-ენის ცნობით, ტრამპი და მისი მრჩევლები ომის დასასრულებლად „გადამწყვეტი“ მოქმედების ვარიანტებს თვეების განმავლობაში განიხილავდნენ. ისინი აშშ-ის ამომრჩევლებს შორის ომის მზარდ არაპოპულარობასაც ითვალისწინებდნენ.

ერთ-ერთმა ანონიმურმა წყარომ გამოცემას განუცხადა, რომ ტრამპმა სამხედროებს დამატებითი დარტყმის გეგმების შემუშავება უბრძანა. ისინი „დიდძალ ენერგეტიკულ ინფრასტრუქტურას“ მოიცავს და შესაძლოა MOAB-ის გამოყენებასაც ითვალისწინებდეს.

კიდევ ერთი წყაროს თქმით, გეგმები ბირთვულ ობიექტებზე, მათ შორის ე.წ. პიკაქსის მთაზე, დარტყმას მოიცავს. ბოლო კვირებში ტრამპი ამ ობიექტზე თავდასხმით არაერთხელ დაიმუქრა.

გასულ წელს აშშ-მა ფორდოუს, ნათანზისა და ისპაჰანის მიწისქვეშა ბირთვულ ობიექტებზე ინტენსიური დარტყმები განახორციელა. რამდენიმე მეტრი კლდისა და ნიადაგის გასარღვევად GBU-57 ტიპის მძიმე შეღწევადი, ე.წ. „ბუნკერსაწინააღმდეგო“ ბომბები გამოიყენეს.

შვიდმა B-2 ტიპის ბომბდამშენმა ფორდოუსა და ნათანზზე სულ 14 ცალი 14 000-კილოგრამიანი ბომბი ჩამოაგდო. ისპაჰანს კი აშშ-ის წყალქვეშა ნავიდან გაშვებული ორ ათეულზე მეტი „ტომაჰავკის“ რაკეტა მოხვდა.

პენტაგონის ხელმძღვანელმა პიტ ჰეგსეთმა მაშინ განაცხადა, რომ ტრამპის ბრძანების შემდეგ თავდასხმების განსახორციელებლად „პოზიციების დაკავებასა და მომზადებას თვეები და კვირები დასჭირდა“. თუმცა, მალევე აშშ-ის თავდაცვის სადაზვერვო სააგენტოს (DIA) ანგარიშში შეფასდა, რომ დარტყმებმა ოპერაციები მხოლოდ რამდენიმე თვით შეაფერხა.

აშშ ამტკიცებდა, რომ ირანი ბირთვული იარაღის წარმოების შესაძლებლობას მეტისმეტად უახლოვდებოდა. თუმცა, გაეროს ბირთვული ზედამხედველის, ატომური ენერგიის საერთაშორისო სააგენტოს თქმით, არაფერი ადასტურებდა კოორდინირებული შეიარაღების პროგრამის არსებობას.