ტრამპს სამშვიდობო მოლაპარაკებებიდან რუსეთის ჩამოშორება არ სურს

პრეზიდენტმა დონალდ ტრამპმა განაცხადა, რომ რუსეთთან დიზელის შეთანხმება და „ჯოჯოხეთური სანქციების“ დაწესებაზე უარი სამშვიდობო მოლაპარაკებების დაწყების მცდელობა იყო.

აშშ-ის პრეზიდენტმა Truth Social-ის პლატფორმაზე დაწერა: „რუსეთთან დაკავშირებით ჩემი გადაწყვეტილება ძალიან მარტივია. რუსეთსა და უკრაინას შორის ომში მშვიდობის მისაღწევად მოლაპარაკებებს ვაწარმოებ. არ მსურს ისეთი რამის გაკეთება, რაც რუსეთს მოლაპარაკების მაგიდას უგუნურად ჩამოაშორებს“. ტრამპმა ასევე განაცხადა, რომ რუსეთი ირანის მხარდასაჭერად თითქმის არაფერს აკეთებს „იმასთან შედარებით, რისი გაკეთებაც შეეძლო“. მან დასძინა, რომ სურს, ვითარება ასე დარჩეს.

ტრამპმა უკრაინის პრეზიდენტი ვოლოდიმირ ზელენსკი კვლავ გააკრიტიკა: „ზელენსკი რუსეთში დიზელის ნავთობგადამამუშავებელ ქარხნებს სამიზნეებად იყენებს. მან იცის, რომ ეს თავდასხმები დიზელის მსოფლიო ბაზრებს, მათ შორის აშშ-ის ბაზარსაც, სერიოზულად აზიანებს“. ტრამპის თქმით, რუსეთი „მსოფლიოს მილიონობით ბარელ დიზელს დაბალ ფასად აწვდის“, მაგრამ ზელენსკის ეს „არ ადარდებს“.

ტრამპმა განაცხადა: „ზელენსკის ამ ომის დასრულება არ სურს და, ალბათ, არც არასდროს სურდა“.

აშშ-ის პრეზიდენტმა თქვა: „ორი წლის წინ მას შეეძლო, ახლანდელზე უკეთესი შეთანხმება დაედო“.