ტუხელი ცვლილებებს იცავს, თუმცა აღიარებს, რომ ისინი ნაადრევი იყო

ინგლისის მთავარმა მწვრთნელმა თომას ტუხელმა ზაფხულში არგენტინასთან მსოფლიო ჩემპიონატის ნახევარფინალში მარცხისას გაკეთებული, მკაცრად გაკრიტიკებული დაცვითი ცვლილებები დაიცვა. თუმცა მან აღიარა, რომ ისინი ნაადრევად განახორციელა.

ტუხელის თქმით, ატლანტაში ინგლისი „სიკვდილს ელოდა“ და არგენტინის შემტევ ტაქტიკას ვერ უმკლავდებოდა. მეტოქე თამაშის შემოტრიალებას ცდილობდა მას შემდეგ, რაც მე-60 წუთზე ენტონი გორდონმა ანგარიში გახსნა. ტუხელმა აღნიშნა, რომ გადაწყვეტილებებზე დაღლილობამაც იმოქმედა. მან ასევე გაითვალისწინა მექსიკასა და ნორვეგიასთან პლეი-ოფის მატჩებში ხუთმცველიანი დაცვით წარმატებული თამაში და უპირატესობის შენარჩუნება სცადა.

ეს მიდგომა კატასტროფული აღმოჩნდა. მატჩის მიწურულს ენცო ფერნანდესისა და ლაუტარო მარტინესის გოლებმა ინგლისს 1966 წლის შემდეგ პირველ მსოფლიო ჩემპიონატის ფინალში გასვლის იმედი გაუქრო.

ტუხელმა ინგლისის ნაკრების აპლიკაციაში გამოქვეყნებულ დოკუმენტურ ფილმში თქვა: „აქ შეგიძლიათ ჩემი განადგურება სცადოთ. მაგრამ ეს ჩემი იარაა და არა თქვენი. ჩემზე მეტად არავინ განიცდის, გამარჯვება ჩემზე მეტად არავის სურდა. შეგიძლიათ უსასრულოდ იტანჯოთ თავი და იფიქროთ: ‘სხვა ცვლილებები რომ გამეკეთებინა, მატჩს მოვიგებდით’. ეს უბრალოდ არ იცით“.

ტუხელმა დასძინა: „რა თქმა უნდა, შემტევი ცვლილებების გაკეთება შეიძლებოდა. არავინ იცის, რა მოხდებოდა. შესაძლოა, ასე მოვქცეულიყავით და 2:1 წაგვეგო. შემდეგ იტყოდნენ: ‘გაგიჟდა? ნორვეგიასთან მატჩი ხუთი მცველით დაასრულა, აქ რატომ არ ითამაშა ხუთი მცველით?’ ჩემი ნანახის, გამოცდილებისა და ინფორმაციის მიხედვით, არგენტინამ წარმოუდგენლად რისკიანი თამაში დაიწყო. ისინი ცვლილებას ცვლილებაზე აკეთებდნენ და ყოველი მათგანი შემტევი იყო. პრობლემის გადასაჭრელად ეს გზა ავირჩიე“.

მისივე თქმით: „მწვრთნელის ჩარევა სწორედ ამას ნიშნავს. დახმარებას ცდილობ. არაფერს აკეთებ საკუთარი ეგოსთვის ან სხვა მიზეზით. უბრალოდ დახმარებას ცდილობ“.

გოლის შემდეგ ინგლისი მეტოქის ზეწოლაში მოექცა. ჯედ სპენსმა ბოლო მომენტში ვარდნით შეაჩერა შეტევა, ხოლო ჯორდან პიკფორდმა მნიშვნელოვანი დარტყმა მოიგერია. ეს ეპიზოდები წყლის შესვენებამდე მოხდა. შემდეგ ტუხელმა საბედისწერო გადაწყვეტილება მიიღო და გოლის ავტორი გორდონი მცველ ეზრი კონსათი შეცვალა.

ნახევარფინალში მარცხის შემდეგ გერმანელი სპეციალისტის გათავისუფლებას მოითხოვდნენ. თუმცა ტუხელი ამტკიცებს, რომ მეტოქის უკიდურესად შემტევმა ტაქტიკამ მას არჩევანი არ დაუტოვა. ტუხელმა თქვა: „არგენტინა ძალიან, ძალიან სწრაფად ათამაშდა. სიტყვებისთვის ბოდიშს ვიხდი, მაგრამ ისინი ყველაფერზე ხელაღებულ ფეხბურთს თამაშობდნენ: ‘დასაკარგი არაფერი გვაქვს. ბოლომდე შევუტიოთ’. როცა ჩემს გადაწყვეტილებას ვაანალიზებ, გადამწყვეტი მომენტი მახსენდება. წყლის შესვენებამდე მეტოქეს უდიდესი შანსი მივეცით. ვიფიქრე: ‘ვერ გადავრჩებით. ეს სიკვდილის ლოდინია. ბურთს ვერ ვფლობთ, კარგად ვერ ვიცავთ თავს და 4-4-2 სქემაში სათანადოდ ვერ ვთამაშობთ. დახმარება გვჭირდება’“.