უკრაინულმა დრონებმა რუსეთის ფინანსთა სამინისტროს მონაცემთა ცენტრი დააზიანეს

უკრაინასთან მიმდინარე ომის ფონზე რუსეთმა კიდევ ერთი მონაცემთა ცენტრი დაკარგა. დრონები გოროდეცის გარეუბანში, სამთავრობო მონაცემთა ცენტრს დაესხნენ თავს. ის კრემლიდან აღმოსავლეთით დაახლოებით 230 მილის დაშორებით, ხოლო ფრონტის ხაზიდან 600 მილზე მეტ მანძილზე მდებარეობს. Data Center Dynamics-ის (DCD) ცნობით, ახლახან დრონებით დაზიანებულ მონაცემთა ცენტრს რუსეთის ფინანსთა სამინისტრო მართავს. სავარაუდოდ, იქ რამდენიმე სახელმწიფო რეესტრი ინახებოდა, მათ შორის, ფედერალური საგადასახადო სამსახურის მონაცემთა ბაზა.

DCD-მა რუსულ მედიასაშუალებაზე დაყრდნობით დაწერა: „ეს ობიექტი რუსეთის ფედერალური საგადასახადო სამსახურის ორი ძირითადი მონაცემთა დამუშავების ცენტრიდან ერთ-ერთია. ცენტრები გეოგრაფიულად განცალკევებულ რეჟიმში მუშაობენ“. გამოცემის ცნობით, „ამ ობიექტის დაზიანებამ შესაძლოა რუსეთის ფედერაციის სახელმწიფო საინფორმაციო სისტემების მუშაობაზე იმოქმედოს“.

ოქტომბრის დასაწყისიდან უკრაინამ რუსეთის მონაცემთა ცენტრებს რამდენჯერმე შეუტია. მან ეს მას შემდეგ დაიწყო, რაც მოსკოვმა კონფლიქტი გაამწვავა და უკრაინის მონაცემთა ცენტრებს დაარტყა. როგორც ცნობით, რუსეთის ფინანსთა სამინისტროს კიდევ ორი მონაცემთა ცენტრი აქვს: ერთი დუბნაში, მოსკოვის ოლქში მდებარე მონაცემთა დამუშავების ფედერალურ ცენტრშია, მეორე კი ვოლგოგრადის ოლქის იერზოვკაში. მონაცემთა ცენტრების მესამედის დაკარგვამ შესაძლოა მნიშვნელოვანი გავლენა მოახდინოს მთავრობის მიერ მიწოდებულ მომსახურებებზე.

თანამედროვე საზოგადოება ციფრულ მომსახურებებზეა დამოკიდებული, ამიტომ მონაცემთა ცენტრები კრიტიკულ ინფრასტრუქტურად იქცა და კონფლიქტების დროს მნიშვნელოვან სამიზნეებს წარმოადგენს. უკრაინული დრონებით დარტყმების შემდეგ რუსეთის Yandex-ის ბოტების ტრაფიკი მკვეთრად შემცირდა. თუმცა, მისი დეზინფორმაციის ბოტების ქსელი დაუზიანებელ მონაცემთა ცენტრებში გადავიდა და ჩვეულ რეჟიმში მუშაობა განაგრძო.

სამოქალაქო მონაცემთა ცენტრის კონფლიქტში მოხვედრის კიდევ ერთი შემთხვევა ახლო აღმოსავლეთში მოხდა. ირანულმა ძალებმა არაბთა გაერთიანებულ საამიროებსა და ბაჰრეინში AWS-ის ობიექტებს დაარტყეს. ეს აშშ-ის მიერ დაბომბვის კამპანიის საპასუხოდ მოხდა, რომელიც თებერვალში დაიწყო. ამის შედეგად რეგიონში ბევრ ციფრულ მომსახურებას შეფერხება შეექმნა. ამიტომ Amazon-მა კლიენტების დიდ ნაწილს ურჩია, შემდგომი შეფერხებების თავიდან ასაცილებლად სხვა რეგიონებში გადასულიყვნენ.

რუსეთის შეჭრა უკრაინაში 2014 წელს დაიწყო, როცა მან ყირიმის ნახევარკუნძული ძალით დაიკავა. თუმცა, არსებული ვითარება 2022 წელს გამწვავდა, როცა მოსკოვი კიევის აღებას შეეცადა. ეს 12-წლიანი კონფლიქტი განსაკუთრებით სასიკვდილო გახადა ფრონტის ხაზზე დანერგილმა ახალმა ტექნოლოგიებმა და სტრატეგიებმა, მათ შორის, დრონების ფართომასშტაბიანმა და ინოვაციურმა გამოყენებამ.