ზელენსკი: რუსეთი ენერგეტიკულ ობიექტებზე იერიშებს აგრძელებს

ევროკავშირის დიპლომატს ენერგეტიკული ცეცხლის შეწყვეტა საეჭვოდ მიაჩნია

ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კაია კალასმა ორშაბათს უკრაინაში ენერგეტიკულ ობიექტებზე იერიშების შეჩერების შესაძლებლობა დადებითად შეაფასა. თუმცა მან თქვა, რომ რუსეთის მხრიდან შეთანხმების დაცვის სურვილს ვერ ხედავს.

ლუქსემბურგში ევროკავშირის საგარეო საქმეთა მინისტრების შეხვედრაზე კალასმა განაცხადა: „ჯერ არ გვინახავს, რომ რუსეთიც დაიცავს მას. პირადად მე მივესალმებოდი, თუ ცეცხლის შეწყვეტა ადამიანების მკვლელობასაც მოიცავდა და არა მხოლოდ ენერგეტიკას“.

რუსეთისგან დიზელის შესყიდვის შესახებ ტრამპისა და პუტინის შეთანხმებამ აშშ-ში, უკრაინასა და ევროპაში ოფიციალური პირები შეაშფოთა. ექვსმა სენატორმა, მათ შორის ოთხმა რესპუბლიკელმა, კვირას ტრამპის ადმინისტრაციას შეთანხმების დაუყოვნებლივ შეცვლისკენ მოუწოდა. მათი თქმით, ვიდრე რუსეთი უკრაინელ მშვიდობიან მოსახლეობას კლავს, აშშ-მა „პუტინს ფინანსური მაშველი რგოლი არ უნდა მიაწოდოს“.

ესტონეთის საგარეო საქმეთა მინისტრმა მარგუს ცაჰკნამ ორშაბათს ლუქსემბურგში ჟურნალისტებს უთხრა, რომ შეთანხმება საწვავის ფასებზე მნიშვნელოვან გავლენას ვერ მოახდენს. მისი შეფასებით, ის „ბევრად მეტად აშშ-ის შიდა ვითარებას უკავშირდება“.

კალასი ასევე არ დაეთანხმა ტრამპის შაბათის განცხადებას, რომ უკრაინას ახალი პრეზიდენტი სჭირდება და ზელენსკიმ ომის დასასრულებლად საკმარისი არ გააკეთა. კალასის თქმით, უკრაინაში არჩევნების დრო ახლა არ არის, სულ მცირე, ცეცხლის შეწყვეტის გარეშე.

ზელენსკიმ ორშაბათს თქვა, რომ ომის დროს უკრაინაში არჩევნების ჩატარება შეუძლებელია, განსაკუთრებით რუსეთის ახალი ტაქტიკის გამო, რომელიც დღე-ღამის განმავლობაში თავდასხმებს გულისხმობს. თუმცა, სულ მცირე, 60-დღიანი სრული ცეცხლის შეწყვეტის შემთხვევაში, ის არჩევნების ჩასატარებლად მუშაობისთვის მზადაა.

რუსეთის იერიშს სამი ადამიანი ემსხვერპლა

კიევის სამხედრო ადმინისტრაციის ცნობით, ორშაბათს ქალაქზე დღისით განხორციელებული რუსული იერიშების შედეგად ორი ადამიანი დაშავდა. რუსული თავდასხმის ნამსხვრევებმა დედაქალაქის დარნიცკის რაიონში კერძო საცხოვრებელ შენობაში ხანძარი გამოიწვია.

ნამსხვრევები სოლომიანსკის რაიონში კერძო საცხოვრებელ შენობებთან ღია ტერიტორიაზე და დარნიცკის რაიონში საწყობის შენობაზეც ჩამოცვივდა. შემთხვევის ადგილებზე საგანგებო სამსახურები გაიგზავნა.

ხარკოვის საოლქო პროკურატურის ცნობით, კვირას საღამოს ხარკოვის რაიონის სოფელ პისოჩინზე რუსეთის დრონით თავდასხმას სამი ადამიანი ემსხვერპლა და ცხრა დაშავდა, მათ შორის ბავშვები. გამომძიებლების თქმით, იერიში მრავალბინიან სახლებსა და სასურსათო მაღაზიებთან მჭიდროდ დასახლებულ ტერიტორიას მოხვდა და ხანძარი გამოიწვია.

უკრაინის საჰაერო ძალებმა Telegram-ზე დაწერა, რომ ორშაბათს ღამით უკრაინის საჰაერო თავდაცვამ 121 რუსული დრონიდან 89 ჩამოაგდო ან გააუვნებლა. იერიშში ერთი Kh-59 ტიპის მართვადი ჰაერი-ხმელეთის რაკეტა და 121 დრონი მონაწილეობდა, მათ შორის 76 რეაქტიული Shahed-ის ტიპის დრონი.

უკრაინაში დარტყმები 15 ადგილას დაფიქსირდა, ხოლო ჩამოგდებული დრონების ნამსხვრევები ოთხ ადგილას ჩამოცვივდა.

რუსეთის თავდაცვის სამინისტრომ ორშაბათს განაცხადა, რომ მისმა საჰაერო თავდაცვამ ღამით 151 უკრაინული დრონი მოიგერია. დრონები რუსეთის რეგიონების, უკანონოდ ანექსირებული ყირიმისა და შავი ზღვის წყლების თავზე დაფიქსირდა.

სამინისტრომ ცალკე განცხადებაში თქვა, რომ მისმა ძალებმა ღამით უკრაინის დაუკონკრეტებელ საპორტო ინფრასტრუქტურასა და ოდესისკენ მიმავალ მშრალტვირთმზიდს დრონებით შეუტიეს. სამინისტროს ცნობით, გემზე სამხედრო ტვირთი იყო.

თემებიდონალდ ტრამპივლადიმერ პუტინივოლოდიმირ ზელენსკიკაია კალასიმარგუს ცაჰკნაევროკავშირიკიევირუსეთიუკრაინახარკოვი

გამოქვეყნდა 12 ოქტომბერი, 2026