2028 წლის ევროპის ჩემპიონატზე საპრიზო ფონდი რეკორდული იქნება

2028 წელს პოლონეთის სილეზიაში გამართული მძლეოსნობის ევროპის ჩემპიონატის საპრიზო ფონდი რეკორდული, დაახლოებით 3 მილიონი ფუნტი იქნება.

50-ივე დისციპლინაში ფულად ჯილდოს პირველ რვა ადგილზე გასული სპორტსმენები მიიღებენ.

ოქროს მედლის მფლობელები 30 000 ევროს (25 720 ფუნტს) მიიღებენ. ვერცხლისა და ბრინჯაოს მედალოსნებს, შესაბამისად, 15 000 ევრო (12 860 ფუნტი) და 10 000 ევრო (8 573 ფუნტი) გადაეცემათ.

50 დისციპლინაში მეოთხე-მერვე ადგილებზე გასული სპორტსმენები, შესაბამისად, 5 000, 4 000, 3 000, 2 000 და 1 000 ევროს მიიღებენ.

ევროპის მძლეოსნობის ასოციაციამ (European Athletics) საპრიზო თანხების განაწილების წესი შეცვალა. შედეგად, ყველა დისციპლინაში პირველ რვა ადგილზე გასული სპორტსმენი ფულად ჯილდოს მიიღებს.

ბოლო ჩემპიონატი მიმდინარე წლის აგვისტოში ბირმინგემში გაიმართა. მაშინ საპრიზო ფონდი თითოეული საპრიზო ადგილისთვის სტანდარტულ ანაზღაურებას არ ითვალისწინებდა.

ამის ნაცვლად, 500 000 ევრო (428 000 ფუნტი) 10 კატეგორიაში ნაჩვენები 10 საუკეთესო შედეგის ავტორებს თანაბრად გაუნაწილდათ. კატეგორიებიდან ხუთი კაცებისთვის, ხუთი კი ქალებისთვის იყო განკუთვნილი, ხოლო შედეგები მძლეოსნობის მსოფლიო ფედერაციის (World Athletics) ქულების ცხრილებით განისაზღვრა.

დიდი ბრიტანეთისა და ჩრდილოეთ ირლანდიის გუნდმა ბირმინგემში 19 მედალი, მათ შორის ცხრა ოქრო მოიპოვა.

თუმცა, ამ ცხრა გამარჯვებიდან ვერც ერთმა მოიპოვა ორგანიზატორების მიერ დაწესებული 50 000 ევროს ოდენობის „ოქროს გვირგვინის“ პრემია.

ევროპის ჩემპიონატის საპრიზო თანხის მნიშვნელოვანი ზრდა ასახავს, რომ უმაღლესი დონის სპორტსმენების შემოსავლის შესაძლებლობა იზრდება.

მძლეოსნობის მსოფლიო ფედერაციამ ცოტა ხნის წინ ბუდაპეშტში თავისი ახალი სამდღიანი შეჯიბრებისთვის, „უმაღლესი ჩემპიონატისთვის“ (Ultimate Championship), 10 მილიონი დოლარი (7,4 მილიონი ფუნტი) გამოყო. ორგანიზაციამ ამას „სპორტის ისტორიაში უმდიდრესი საპრიზო ფონდი“ უწოდა.

როგორ მოექცა ყურადღების ცენტრში რბოლა, რომლის შესახებაც ამბობდნენ, რომ ქალები მას ვერ გაირბენდნენ

სპორტსმენები სეზონს გულდასმით გეგმავენ. ამიტომ ჩემპიონატებს ძლიერი შემადგენლობის უზრუნველსაყოფად შესაძლოა მნიშვნელოვანი სტიმულების შეთავაზება დასჭირდეთ.

2028 წელს კიდევ ერთი „უმაღლესი ჩემპიონატი“, ლოს-ანჯელესის ოლიმპიური თამაშები და ბრილიანტის ლიგის სეზონი გაიმართება.