ახლო აღმოსავლეთში მიწოდების რისკების ფონზე ნავთობი კვლავ გაძვირდა

ნოემბერში მისაწოდებელი საერთაშორისო საორიენტაციო ბრენტის ნავთობის ფიუჩერსები 1,22%-ით, ბარელზე 106,56 დოლარამდე გაძვირდა. აშშ-ის დასავლეთ ტეხასური საშუალო ნავთობის ფიუჩერსები 1%-ზე მეტით, ბარელზე 93,57 დოლარამდე გაიზარდა.

აშშ და ირანი კონფლიქტის დასრულების განახლებული ძალისხმევის ფარგლებში შუამავლებთან ცალ-ცალკე მოლაპარაკებებს მართავენ. ალ-ჯაზირას (Al Jazeera) ცნობით, ირანის საგარეო საქმეთა მინისტრმა აბას არაღჩიმ განაცხადა, რომ თეირანმა ნიუ-იორკში კატარის შუამავლების მეშვეობით აშშ-სთან არაპირდაპირი მოლაპარაკებები გამართა.

VT Markets Dubai-ს უფროსმა საბაზრო ანალიტიკოსმა მაჰმუდ მაშალმა განაცხადა, რომ ბაზრების მთავარი ყურადღება მოლაპარაკებების მიმდინარეობაზე გამახვილდება, რადგან რეგიონის შუამავლები ცეცხლის შეწყვეტაზე მოლაპარაკებების დაწყებას ცდილობენ. მისი თქმით, მნიშვნელოვანმა წინსვლამ ნედლი ნავთობის ფასი შესაძლოა შეამციროს.

მაშალის თქმით, საუდის არაბეთსა და ჰუსიებს შორის განახლებული დაძაბულობის გამო რეგიონის ენერგეტიკული ინფრასტრუქტურისა და მიწოდების ნაკადების შესახებ შეშფოთება კვლავ ნარჩუნდება.

ბაზარი კვლავ ყურადღებით აკვირდება ჰორმუზის სრუტეს. ომამდე ამ მნიშვნელოვან საზღვაო გზაზე მსოფლიოს ნავთობის მიწოდების 20% გადიოდა.

დონალდ ტრამპმა შაბათს თეირანის პირობითი წინადადება უარყო, რომელიც სრუტის ხელახლა გახსნას ეხებოდა. მან თანაშემწეებს უთხრა, რომ ნოემბრის შუალედური არჩევნების შემდეგ ირანის დაბომბვის განახლებას გეგმავს.