ანგარიში: ფედერალურ სარეზერვო სისტემას SVB-ის სისუსტე უნდა სცოდნოდა

ბოუმენმა საკონსულტაციო კომპანია სტარლინგ ედვაიზორი გრუპის (Starling Advisory Group) შეფასების შედეგები პარასკევს ლონდონში სიტყვით გამოსვლისას გამოაცხადა.

2023 წლის მარტში სილიკონის ველის ბანკიდან დეპოზიტების მასობრივი გადინება დაიწყო. მანამდე ბანკმა განაცხადა, რომ ფასიანი ქაღალდები 1,8 მილიარდი დოლარის ზარალით გაყიდა და დამატებითი კაპიტალის მოზიდვა სჭირდებოდა. ბანკის მფლობელობაში არსებული დიდი მოცულობის აშშ-ის სახაზინო ფასიანი ქაღალდები გაუფასურდა, როცა ფედერალურმა სარეზერვო სისტემამ საპროცენტო განაკვეთების გაზრდა დაიწყო.

ბოუმენის თქმით, შეფასებამ დაადგინა, რომ ბანკის დეპოზიტების „94 პროცენტი დაუზღვეველი იყო და ვენჩურული კაპიტალით მხარდაჭერილ ტექნოლოგიურ კომპანიებში იყო კონცენტრირებული“.

დეპოზიტების გადინების შემდეგ დეპოზიტების დაზღვევის ფედერალური კორპორაცია (Federal Deposit Insurance Corporation) და ფედერალური სარეზერვო სისტემა ჩაერივნენ. მათ ბანკი დახურეს და დეპოზიტების დაცვა უზრუნველყვეს.

ფედერალური სარეზერვო სისტემის მაშინდელმა მთავარმა ზედამხედველმა, ზედამხედველობის საკითხებში ყოფილმა ვიცე-თავმჯდომარემ მაიკლ ბარმა, 2023 წელს ამ შემთხვევის შეფასება ჩაატარა. შეფასებამ დაადგინა, რომ ფედერალური სარეზერვო სისტემის თანამშრომლები რეაგირებისას მეტისმეტ სიფრთხილეს იჩენდნენ.

ახალი შეფასება უფრო შორს მიდის და ამბობს, რომ ფედერალური სარეზერვო სისტემის ზედამხედველებმა რისკების შესახებ წინასწარ იცოდნენ ან უნდა სცოდნოდათ.

ბარმა ზედამხედველის თანამდებობა 2025 წლის თებერვალში დატოვა, რათა პრეზიდენტ დონალდ ტრამპს ფედერალური სარეზერვო სისტემის ახალი მთავარი მარეგულირებელი შეერჩია. პრეზიდენტმა ბოუმენი აირჩია, რომელიც სენატმა ამ თანამდებობაზე დაამტკიცა.

ახალი შეფასების შედეგები, სავარაუდოდ, კრიზისში ბარის როლთან დაკავშირებით ახალ კითხვებს გააჩენს. თუმცა ბოუმენს გამოსვლაში ბარი სახელით არ უხსენებია.

ფედერალური სარეზერვო სისტემის წარმომადგენელმა ახალი ანგარიშის შესახებ კომენტარის მოთხოვნით განხორციელებულ სატელეფონო ზარს დაუყოვნებლივ არ უპასუხა.

ტრამპმა ფედერალური სარეზერვო სისტემის მმართველთა საბჭო მის მიმართ „მტრულ“ დამოკიდებულებაში დაადანაშაულა. ზოგი ანალიტიკოსი მიიჩნევს, რომ ანგარიშმა შესაძლოა ტრამპს ბარის მმართველის თანამდებობიდან გადაყენების მცდელობისკენ უბიძგოს.