Anthropic-ის მესამე კვარტლის შემოსავალმა 17 მილიარდი დოლარი შეადგინა

Anthropic-მა (Anthropic) ორშაბათს აშშ-ის ფასიანი ქაღალდებისა და ბირჟების კომისიაში შესწორებული S-1 ფორმის დოკუმენტი წარადგინა და განახლებული ფინანსური მონაცემები გამოაქვეყნა. ამით ინვესტორებს კომპანიის საქმიანობის მდგომარეობის უფრო სრულყოფილი სურათი მიეცათ.

ხელოვნური ინტელექტის კომპანიამ განაცხადა, რომ 30 სექტემბრით დასრულებულ ცხრა თვეში მისმა შემოსავალმა 33,24 მილიარდი დოლარი შეადგინა. ეს გასული წლის შესაბამის პერიოდთან შედარებით, დაახლოებით, 1 200%-იანი ზრდაა. კომპანიამ ამ პერიოდში 104 მილიარდი დოლარის წმინდა ზარალი აჩვენა, თუმცა მისი უმეტესი ნაწილი კონვერტირებადი ობლიგაციებისა და წარმოებული ფინანსური ვალდებულებების სამართლიანი ღირებულების ცვლილებას უკავშირდებოდა. 2025 წლის იმავე პერიოდში Anthropic-ის ზარალმა 25,1 მილიარდი დოლარი შეადგინა.

Anthropic-მა მოსალოდნელი პროსპექტი გასულ კვირას გამოაქვეყნა, რაც კომპანიას შესაძლოა ისტორიული პირველადი საჯარო შეთავაზებისკენ კიდევ ერთი ნაბიჯით აახლოებდეს. თავდაპირველი დოკუმენტი Claude-ის შემქმნელის ფინანსურ მონაცემებს მხოლოდ წლის პირველი ნახევრის ჩათვლით მოიცავდა.

მესამე კვარტალში Anthropic-ის შემოსავალმა დაახლოებით 17 მილიარდი დოლარი შეადგინა, რაც გასული წლის იმავე პერიოდთან შედარებით დაახლოებით 1 127%-ით მეტია. თუმცა, კვარტალთან შედარებით, შემოსავლების ზრდის ტემპი შენელდა. მესამე კვარტლის შემოსავალი დაახლოებით 47%-ით გაიზარდა, მაშინ როცა მეორე კვარტალში ზრდამ 144%, ხოლო პირველში 132% შეადგინა.

კომპანიის წმინდა ზარალი მესამე კვარტალში 23,29 მილიარდი დოლარი იყო.

ხუთი წლის კომპანია, რომელიც ინვესტორებთან შეხვედრების ტურის დასაწყებად ემზადება, ხელოვნური ინტელექტის ინფრასტრუქტურის გაფართოებასთან დაკავშირებულ მზარდ საბაზრო შეშფოთებას უნდა გაუმკლავდეს. უოლ-სტრიტზე შიშობენ, რომ საპროცენტო განაკვეთების ზრდა მონაცემთა ცენტრებისა და ნეოღრუბლოვანი გამოთვლითი სერვისების ბევრი მიმწოდებლისთვის სესხებს მიუწვდომელს გახდის. Microsoft-ის, Google-ისა და Amazon-ის გასულ კვირას გამოქვეყნებულმა კვარტალურმა ანგარიშებმა ეს შეშფოთება კიდევ უფრო გააძლიერა.

ჰიპერმასშტაბური ღრუბლოვანი სერვისების კომპანიების მიერ ხელოვნურ ინტელექტში აგრესიული ინვესტიციები მათ ფულად ნაკადებს ამცირებს. ამის გამო ზოგიერთ ინვესტორს ეჭვი ეპარება, რომ გამოთვლითი სიმძლავრე Anthropic-ის მოთხოვნის დასაკმაყოფილებლად საკმარისად სწრაფად ამოქმედდება. Anthropic საჭირო სიმძლავრის დიდ ნაწილს Amazon-ის, Google-ისა და SpaceX-ისგან იღებს, თუმცა სწრაფი გაფართოების პარალელურად გამოთვლითი რესურსების ნაწილს ნეოღრუბლოვანი სერვისების მიმწოდებლებისგანაც იყენებს.

შესწორებულ S-1 დოკუმენტში Anthropic-მა განაცხადა, რომ შესყიდვების ვალდებულებებისა და იჯარის ხელშეკრულებების ფარგლებში ჯამურად დაახლოებით 895,4 მილიარდი დოლარის ხარჯვის ვალდებულება აიღო. კომპანიამ აღნიშნა, რომ ამ თანხის „თითქმის მთელი ნაწილი გამოთვლით რესურსებსა და ინფრასტრუქტურას უკავშირდება“.