აშშ და ჩინეთი კისინჯერის ხელოვნური ინტელექტის კოშმარს უახლოვდებიან

თუმცა, სიცოცხლის ბოლო წლებში კისინჯერი კიდევ უფრო დიდ საფრთხეზე იყო კონცენტრირებული. მისი დაკვირვებით, კაცობრიობის ისტორიაში პირველად, ტექნოლოგიას, თვითსწავლებად მანქანებს, ნებისმიერი რამისთვის, ნებისმიერ ადგილას და ნებისმიერი სახის ზიანის მიყენება შეეძლო. ეს მსოფლიოს „100%-ით დაუცველს“ ხდიდა.

კისინჯერი ხელოვნური ინტელექტის გამო კატასტროფის მომლოდინე გახდა. მან აშშ-სა და ჩინეთს „კატასტროფული შედეგების“ თავიდან ასაცილებლად მოლაპარაკების დაწყებისკენ მოუწოდა. ნიმუშად საბჭოთა კავშირთან ბირთვული შეიარაღების კონტროლის შეთანხმებები უნდა გამოეყენებინათ, რომლებზეც თავად კისინჯერი მოლაპარაკებას აწარმოებდა.

შესაძლოა, კისინჯერმა ტექნოლოგია და გლობალურ ძალაუფლებაზე მისი გავლენა უჩვეულო სიზუსტით განჭვრიტა. თუმცა, მისმა რეკომენდაციებმა, თუ როგორ უნდა აეცილებინათ ხელოვნურ ინტელექტთან დაკავშირებული კატასტროფა, დროს ვერ გაუძლო. აშშ-ის პრეზიდენტი დონალდ ტრამპი ამ თვეში ჩინეთის ლიდერ სი ძინპინთან სამიტისთვის ემზადება. ამ ფონზე ცივ ომთან ანალოგიებმა აზრი დაკარგა, რისი მიზეზებიც საყურადღებოა.

პეკინი ბირთვული შეიარაღების შეზღუდვაზე მოლაპარაკების განხილვაზე უარს ამბობს. ზუსტად იმავე მიზეზებით, ის აშშ-სთან ერთად ხელოვნური ინტელექტის განვითარებას არ შეანელებს. ტექნოლოგიური სფეროს ტერმინოლოგიით, ამას „მოწინავე ტექნოლოგიის ტემპის კონტროლი“ ეწოდება.

აშშ-ს გაცილებით მეტი ბირთვული ქობინი აქვს. ხელოვნური ინტელექტის მოდელებში ის სულ მცირე ექვსი თვით წინაა და გაცილებით მეტი გამოთვლითი სიმძლავრე აქვს. პეკინის თვალთახედვით, ორივე სფეროში შეზღუდვა მხოლოდ ვაშინგტონის უპირატესობას განამტკიცებდა. ჩინეთი ზეწოლისა და შანტაჟის წინაშე დაუცველი დარჩებოდა. ჩინეთის არცერთი ლიდერი ამგვარ მორჩილებას არ გამოიჩენდა.

მსგავსი მიზეზებით, ჩინეთი უსაფრთხოების შემზღუდველ წესებსაც უარყოფს. ცივი ომის დროს მოსკოვსა და ვაშინგტონს გაუთვალისწინებელი ესკალაციის თავიდან ასაცილებლად დეტალური პროცედურები ჰქონდათ. თუმცა, პეკინი ფიქრობს, რომ ასეთი წესები მხოლოდ აშშ-ის დაუფიქრებელ მოქმედებას წაახალისებდა. აშშ და ჩინეთი „ქცევის წესებზეც“ კი ვერ თანხმდებიან. ამ წესებმა სამხრეთ ჩინეთის ზღვის მსგავს გეოპოლიტიკურ კერებში გემებისა და თვითმფრინავების მონაწილეობით მომხდარი ინციდენტების შეიარაღებულ კონფლიქტში გადაზრდა უნდა აღკვეთოს.

ზოგი ანალიტიკოსი ამტკიცებს, რომ ობამას ადმინისტრაციამ ხელოვნური ინტელექტის სფეროში თანამშრომლობის იმედისმომცემი პრეცედენტი შექმნა. მათ მაგალითად 2016 წელს ჩინეთის დაყოლიება მოჰყავთ, რომ პარიზის კლიმატის შეთანხმებას შეერთებოდა. თუმცა, ეს შედარებაც გადაჭარბებულია. სინამდვილეში, ჩინეთს კლიმატის ცვლილების წინააღმდეგ ზომების მხარდაჭერის საკუთარი ძლიერი მიზეზები ჰქონდა. მათ შორის იყო საზოგადოებრივი პროტესტი მომაკვდინებელი სმოგის გამო, რომელიც მეგაპოლისებს ფარავდა. ამასთან, უსაფრთხოება იმპორტირებული ნავთობის ადგილობრივი მწვანე ტექნოლოგიებით ჩანაცვლებას მოითხოვდა.