ბერნი სანდერსი და სტივ ბენონი ხელოვნური ინტელექტის შეზღუდვას მოითხოვენ

ხელოვნური ინტელექტის საკითხმა ამერიკული პოლიტიკის საპირისპირო ფრთები გააერთიანა. მემარცხენე სოციალისტმა ბერნი სანდერსმა და მემარჯვენე სტრატეგმა სტივ ბენონმა სწრაფად განვითარებულ ტექნოლოგიაზე ადამიანის კონტროლის გასაძლიერებლად ძალები გააერთიანეს.

ვერმონტის დამოუკიდებელი სენატორი სანდერსი და ტრამპის თეთრი სახლის ყოფილი მრჩეველი ბენონი სამშაბათს ვაშინგტონში „ადამიანის მხარდამჭერ ასამბლეაზე“ გამოვლენ. ღონისძიებაში სხვადასხვა სფეროს წარმომადგენლებიც მიიღებენ მონაწილეობას. ისინი კონგრესის დარწმუნებას შეეცდებიან, რომ ხელოვნური ინტელექტის გავლენის შესაზღუდად უფრო სწრაფად იმოქმედოს.

პროგრესული ლიდერისა და მოძრაობა MAGA-ს წარმომადგენლის იშვიათი თანამშრომლობა აჩვენებს, როგორ ცვლის ხელოვნური ინტელექტი პოლიტიკურ ალიანსებს.

მთელი დღის ღონისძიების ორგანიზატორი არაკომერციული საზოგადოებრივი ორგანიზაცია სიცოცხლის მომავლის ინსტიტუტია (Future of Life Institute). ინსტიტუტმა მარტში ადამიანზე ორიენტირებული მოძრაობის 33 სახელმძღვანელო პრინციპი გამოაქვეყნა. მათი თანახმად, ხელოვნური ინტელექტის მართვა ადამიანების ხელში უნდა დარჩეს, ადამიანებმა მოქმედების თავისუფლება უნდა შეინარჩუნონ, ხოლო ხელოვნური ინტელექტის კომპანიებმა პასუხისმგებლობა უნდა აიღონ.

ღონისძიება მონაცემთა ცენტრების გავრცელებითა და ხელოვნური ინტელექტის მზარდი გავლენით გამოწვეული შეშფოთების ფონზე ტარდება. დარგის წარმომადგენლების გაფრთხილებების შემდეგ, Anthropic-ისა და OpenAI-ის ხელმძღვანელებმა ტექნოლოგიაზე ადამიანის კონტროლის შესანარჩუნებლად ხელოვნური ინტელექტის განვითარების შენელება მოითხოვეს. ამავე დროს, კანონმდებლები წარმომადგენელთა პალატის სპიკერ მაიკ ჯონსონს ხელოვნური ინტელექტის უსაფრთხოების ზომების მიღებისკენ მოუწოდებენ.

ჯონსონმა განაცხადა, რომ ხელოვნური ინტელექტისთვის გარკვეული დამცავი შეზღუდვების დაწესებას მხარს უჭერს. თუმცა, მისი თქმით, უსაფრთხოების ზედამხედველობაზე კომპანიები უნდა აგებდნენ პასუხს და არა კონგრესი.

ჯონსონმა შაბათ-კვირას სი-ენ-ენს უთხრა: „ამაზე მორატორიუმს ვერ დავაწესებთ, რადგან ჩინეთი გაგვისწრებს და სწორედ ესაა გამოწვევა. თუ კონგრესი ნაჩქარევად შეიკრიბება საგანგებო სხდომაზე და ხელოვნური ინტელექტის დარეგულირებას შეეცდება, ჩინეთთან შეჯიბრებას წავაგებთ. ეს თითოეული ამერიკელისთვის საფრთხეა“.

თუმცა, ხელოვნური ინტელექტის გამო ამომრჩეველთა შეშფოთების საპასუხოდ, წარმომადგენელთა პალატა შესაძლოა უკვე სამშაბათს კენჭი უყაროს კანონპროექტს, რომელიც მონაცემთა ცენტრების გავრცელებას ეხება. კანონპროექტი „გადასახადის გადამხდელთა დაცვის აქტის“ სახელითაა ცნობილი. მისი მიზანი ამერიკელების დაცვაა ენერგიის ხარჯების ზრდისგან, რომელიც მონაცემთა ცენტრების მშენებლობას უკავშირდება.