აშშ-მა კოსმოსში იარაღის განთავსება პირველად დაადასტურა

აშშ-ის მედიის ცნობით, ვაშინგტონმა კოსმოსში იარაღის განთავსება პირველად ოფიციალურად დაადასტურა. საჰაერო ძალების მდივანმა ტროი მეინკმა (Troy Meink) გაკეთებული განცხადება ჩინეთისა და რუსეთისადმი გაფრთხილებად შეფასდა. მედიის ცნობით, მეინკმა ორშაბათს, ადგილობრივი დროით, მერილენდის შტატში გამართულ კონფერენციაზე განაცხადა, რომ იარაღი აშშ-ის ძალების დასაცავად და „ცვალებად საფრთხეებზე“ საპასუხოდ იყო აუცილებელი.

მეინკმა თქვა: „დღეს კვლავ ვზრუნავთ, რომ მზად ვიყოთ ცვალებადი საფრთხეების გამოწვევებთან გასამკლავებლად, სადაც უნდა წარმოიშვას ისინი“. მან დასძინა: „სწორედ ამიტომ, აშშ-ს ახლა ორბიტაზე განთავსებული კოსმოსის საკონტროლო იარაღი აქვს, რომელსაც შეიარაღებული ძალების მოწინააღმდეგეთა მტრული ქმედებებისგან დაცვა შეუძლია“.

მეინკმა იარაღის ან მისი განთავსების დროის შესახებ დეტალები არ გაამხილა. თუმცა, Washington Post-ის ცნობით, მან „შეკავებისთვის“ ამ ნაბიჯის მნიშვნელობას გაუსვა ხაზი. მთავრობის ანონიმურმა წარმომადგენელმა გაზეთს უთხრა, რომ აშშ-ის სამხედრო ძალებს, შესაძლოა, მტრული თანამგზავრების განადგურებაც შეეძლოთ. ეს იმ შემთხვევაში მოხდებოდა, თუ ისინი აშშ-ის ძალებს ან თანამგზავრებს სამიზნედ აირჩევდნენ.

განცხადებამ ყურადღების ცენტრში აშშ-ის კოსმოსური ძალები (US Space Force) მოაქცია, რომელიც 2019 წელს პრეზიდენტ დონალდ ტრამპის დროს შეიქმნა. მეინკი უწყების უმაღლესი სამოქალაქო ხელმძღვანელია. USSF-მა კოსმოსში აშშ-ის ინტერესები უნდა დაიცვას, რადგან ეს სივრცე ეროვნული უსაფრთხოებისთვის გადამწყვეტად მიიჩნევა. USSF-ის ვებგვერდზე საფრთხეებად ჩინეთი და რუსეთია დასახელებული, რომლებიც კოსმოსში სამხედრო შესაძლებლობებს აძლიერებენ. ვებგვერდის თანახმად, რუსეთი კოსმოსს მომავალი კონფლიქტების საბრძოლო სივრცედ განიხილავს.

ჩინეთის საგარეო საქმეთა სამინისტრომ სამშაბათს, კოსმოსური ძალების შეფასების პასუხად, აშშ-ს კოსმოსში შეიარაღების ზრდის შეწყვეტისკენ მოუწოდა. სამინისტროს წარმომადგენელმა გუო ძიაკუნმა (Guo Jiakun) პეკინში განაცხადა, რომ ჩინეთი კოსმოსის მშვიდობიან გამოყენებასა და უსაფრთხოების დაცვას თანმიმდევრულად უჭერს მხარს. მისივე თქმით, ჩინეთი კოსმოსის მილიტარიზაციას ეწინააღმდეგება.

უსაფრთხოების ექსპერტები ათწლეულებია აფრთხილებენ, რომ დედამიწის ორბიტა შესაძლოა საბრძოლო სივრცედ იქცეს. ამის მიზეზი თანამედროვე შეიარაღებული ძალების მზარდი დამოკიდებულებაა თანამგზავრებზე, მათ შორის, ნავიგაციისთვის, კომუნიკაციისა და დაზვერვისთვის. თავდასხმებმა შესაძლოა სამოქალაქო კავშირი და მსოფლიო ეკონომიკისთვის გადამწყვეტი სხვა სისტემებიც შეაფერხოს.