აშშ-მა შესაძლოა 600 მილიონი დოლარის ირანული ნავთობი მიიღოს

ირანთან დაკავშირებული სამი ნავთობმზიდი თანდათან აშშ-ისკენ მიემართება. ისინი საზღვაო ძალებმა მაშინ დააკავეს, როცა პრეზიდენტმა დონალდ ტრამპმა ირანის რეჟიმს პირველად ბლოკადა დაუწესა.

ბლუმბერგის ცნობით, „ტიფანი“ (Tifani) და „მაჯესტიკ იქსი“ (Majestic X) ახლა ბრაზილიის სანაპიროსთან იმყოფებიან. საზღვაო ძალები მათ ბორტებზე აპრილში, ინდოეთის ოკეანეში ავიდნენ. მესამე გემი, რომელიც „ლენორისა“ (Lenore) და „დავინას“ (Davina) სახელებითაა ცნობილი, აფრიკის სამხრეთ კიდესთან კეთილი იმედის კონცხს ახლახან გასცდა. ივნისში ინდოეთის ოკეანეში შეჩერებული გემი ახლა ატლანტის ოკეანეში დასავლეთისკენ მიემართება.

სამივე ნავთობმზიდი ნედლი ნავთობის ძალიან დიდი გადამზიდია და თითოეული 2 მილიონ ბარელ ნედლ ნავთობს იტევს. ბრენტის ფიუჩერსების ფასი ამჟამად ბარელზე დაახლოებით 106 დოლარია.

ნავთობმზიდების მონიტორინგის სამსახურმა Tanker Trackers-მა ოთხშაბათს X-ზე დაწერა: „თითქმის ექვსი მილიონი ბარელი ჩამორთმეული ირანული ნედლი ნავთობი, რომლის ღირებულებაც თითქმის 600 მილიონი დოლარია, ატლანტის ოკეანეს ჩუმად კვეთს და ამერიკის შეერთებული შტატებისკენ მიემართება“.

აშშ-მა საზღვაო ბლოკადა აპრილში დაიწყო და სამიზნედ ირანის პორტებში შესვლის ან იქიდან გამოსვლის მსურველი გემები ამოიღო. ბლოკადა ირანთან დაკავშირებულ გემებს მსოფლიოს ნებისმიერ წერტილშიც შეეხო, მათ შორის ინდოეთისა და წყნარ ოკეანეებში.

ზაფხულში ხანმოკლე ცეცხლის შეწყვეტის შემდეგ ბლოკადა მოიხსნა. რამდენიმე კვირის შემდეგ ტრამპმა ის ხელახლა დააწესა, რადგან დაბომბვებიდან ეკონომიკურ ომზე გადავიდა.

ამასთან, სამართლებრივი მექანიზმი, რომელსაც ადმინისტრაცია ნავთობმზიდების დასაკავებლად და მათ ჩამოსართმევად იყენებს, ნადავლის სამართლის სახელითაა ცნობილი. მისი ფესვები შუა საუკუნეებშია.

ქონების სამოქალაქო ჩამორთმევის კანონები აშშ-ის მთავრობას ავალდებულებს, კანონით განსაზღვრული დარღვევა გამოავლინოს და იურისდიქცია დაასაბუთოს. მათგან განსხვავებით, ნადავლის სამართალი დამკავებელი მხარისგან ორდერს არ მოითხოვს. ასევე აუცილებელი არ არის, რომ გემის დაკავება მოქმედი კანონის დარღვევას უკავშირდებოდეს.

სამოქალაქო ჩამორთმევის კანონებით გემის დაკავება სამართალდამცავ უწყებას, მაგალითად, სანაპირო დაცვას უწევს. ამის ნაცვლად, მტრის გემის დაკავება თავდაცვის დეპარტამენტს შეუძლია.

აშშ-ში ნადავლის სამართალი კონსტიტუციაში გვხვდება. მისი ჩამორთმევის მუხლი ომის დროს მტრის გემების დაკავებისა და კონფისკაციის წესებს განსაზღვრავს. სამოქალაქო ომის დროს პრეზიდენტმა აბრაამ ლინკოლნმა კონფედერაციის საზღვაო პორტების დასაბლოკად 1812 წლის ნადავლის აქტი გამოიყენა. ეს კანონი ბოლოს ესპანეთ-ამერიკის ომის დროს გამოიყენეს.