აშშ-მა უკრაინისთვის 500 „პატრიოტის“ რაკეტის გაყიდვა დაამტკიცა

აშშ-ის სახელმწიფო დეპარტამენტმა უკრაინისთვის „პატრიოტის“ ტიპის 500 საზენიტო რაკეტის გაყიდვა დაამტკიცა. დეპარტამენტის ცნობით, შეკვეთის ღირებულება, სავარაუდოდ, 2,1 მილიარდი დოლარია და მას უკრაინის მოკავშირეები სრულად დააფინანსებენ.

განცხადებაში ნათქვამია, რომ უკრაინა რაკეტების საფასურს კანადის, გერმანიისა და ნორვეგიის შენატანებით, აგრეთვე ევროკავშირის უკრაინის მხარდაჭერის საკრედიტო პროგრამიდან გამოყოფილი ეროვნული სახსრებით გადაიხდის.

„პატრიოტის“ ტიპის სისტემები განსაკუთრებით ეფექტიანად მიიჩნევა ბალისტიკური რაკეტების მოსაგერიებლად. რუსეთი ასეთ რაკეტებს უკრაინის წინააღმდეგ ომში იყენებს.

უკრაინის პრეზიდენტმა ვოლოდიმირ ზელენსკიმ კვირის დასაწყისში განაცხადა, რომ მისი ქვეყანა რაკეტების მიწოდების ნებართვას თითქმის ერთი თვეა ელოდება. ზელენსკი აშშ-ს არაერთხელ მოუწოდებდა, ზამთრამდე დაეჩქარებინა მიწოდება. მისი თქმით, ევროპულმა მხარემ რაკეტებისთვის Purl-ის პროგრამის ფარგლებში „უკვე გადაიხადა“. ამის მიუხედავად, უკრაინა რაკეტების მიწოდების ნებართვას ელოდებოდა, მაშინ როცა რუსეთი ენერგეტიკულ და სამოქალაქო ინფრასტრუქტურაზე თავდასხმებს აძლიერებდა.

ბოლო კვირებში უკრაინასა და აშშ-ს შორის ურთიერთობა შესამჩნევად გაცივდა. ზელენსკიმ განაცხადა, რომ მნიშვნელოვანია, მოვლენებს თავისი სახელი დაერქვას და აგრესორს აგრესორი ეწოდოს. მისი თქმით, თუ უკრაინის თავდაცვისთვის განკუთვნილი რაკეტების მიწოდება იბლოკება, მაშინ როცა რუსეთის წინააღმდეგ სანქციები მსუბუქდება, ეს, სამწუხაროდ, პარტნიორების მიერ რეალობის უარყოფაა.

ამის შემდეგ აშშ-ის პრეზიდენტმა დონალდ ტრამპმა ზელენსკის არაკომპეტენტური უწოდა და განაცხადა, რომ ის სამშვიდობო ძალისხმევაში „ნამდვილ დახმარებას არ უწევს“.