აშშ, უკრაინა და რუსეთი მომავალ კვირას მოლაპარაკებებს გამართავენ

მიუხედავად სასიკვდილო თავდასხმებისა და საპასუხო კიბერშეტევებისა, უკრაინის წინააღმდეგ რუსეთის აგრესიული ომის დასრულების რთულ მცდელობაში შესაძლოა, მალე გარკვეული წინსვლა იყოს. კიევის, მოსკოვისა და ვაშინგტონის წარმომადგენლები მომავალ კვირას აბუ-დაბიში ორდღიანი მოლაპარაკებებისთვის უნდა შეხვდნენ ერთმანეთს, აშშ-ის სპეციალურმა წარმომადგენელმა სტივ უიტკოფმა X-ზე დაწერა.

უიტკოფის თქმით, საუბარი ომის შემდგომი პერიოდის უსაფრთხოების შეთანხმებებს, ესკალაციის შემცირებას, ჰუმანიტარულ დახმარებასა და მშვიდობისკენ გადადგმულ მომდევნო ნაბიჯებს შეეხება. სამუშაო დონეზე მოლაპარაკებები არაბთა გაერთიანებული საამიროების დედაქალაქში მომავალ კვირას, სამშაბათსა და ოთხშაბათს გაიმართება. ამ ფორმატში მხარეები ბოლოს თებერვალში, ჟენევაში შეხვდნენ, მანამდე კი აბუ-დაბიში ორჯერ გამართეს მოლაპარაკებები.

ახალ შეხვედრამდე აშშ-ის წარმომადგენლები ამ კვირაში ბრიუსელში ევროპული ქვეყნების, ნატოსა და ევროკავშირის წარმომადგენლებს შეხვდებიან. უიტკოფის ცნობით, განსახილველ საკითხებს შორის იქნება უკრაინის უსაფრთხოების გარანტიები, ომის შემდეგ ევროპის უსაფრთხოების წესრიგი და ქვეყნის აღდგენა.

უკრაინის პრეზიდენტმა ვოლოდიმირ ზელენსკიმ გააფრთხილა საზოგადოება, რომ დაზვერვის ინფორმაციით, რუსეთი აშშ-ის კონგრესის არჩევნების დროს უკრაინის ენერგეტიკულ ინფრასტრუქტურაზე, მათ შორის, მასშტაბური თავდასხმისთვის ემზადება. ზელენსკიმ X-ზე დაწერა, რომ მთელი მსოფლიოს ყურადღება აშშ-ის არჩევნებზე იქნება მიპყრობილი, უკრაინაში კი მიმდინარე მოვლენებს, მათ შორის, საჰაერო თავდაცვისა და „პეტრიოტის“ რაკეტების პრობლემებს, ვერ შეამჩნევენ.

აშშ-ში კონგრესის არჩევნები, ე.წ. შუალედური არჩევნები, დღეს იმართება. პირველი შედეგები ოთხშაბათს ღამით, ცენტრალური ევროპის დროით, გახდება ცნობილი.

ზელენსკიმ საერთაშორისო საზოგადოებას მოუწოდა, რუსეთს მკაფიოდ განუმარტოს, რომ ტერორი მიუღებელია. მისი თქმით, რუსეთზე ისეთი ზეწოლა უნდა განხორციელდეს, რომ ამ ომის დასრულების გარდა სხვა გზა არ დარჩეს.

ორშაბათს, რუსეთის საჰაერო იერიშის შედეგად, ზაპოროჟიეს ოლქის სოფელ კომიშუვახაში სულ მცირე 26 ადამიანი დაიღუპა. ზელენსკის ცნობით, ეს „საშინელი თავდასხმა“ სკოლაში ჰუმანიტარული დახმარების გაცემის დროს მოხდა. ნანგრევებში სხვა შესაძლო მსხვერპლსაც ეძებენ, სულ მცირე ხუთი ადამიანი კი დაიჭრა. ადგილობრივი ხელისუფლების ცნობით, 27 ადამიანი კვლავ დაკარგულად ითვლებოდა.

ზელენსკიმ რუსეთი მიზანმიმართულ დაბომბვაში დაადანაშაულა. მისი თქმით, რუსეთს არ შეიძლებოდა არ სცოდნოდა, რომ კომიშუვახაში დარჩენილი მოსახლეობა ჰუმანიტარულ დახმარებას ყოველ კვირას სწორედ იმ ადგილას იღებდა. ზელენსკიმ მომხდარს „მუხანათური ტერორისტული თავდასხმა“ უწოდა.