ჩინეთი ევროპის გამდიდრებელი დარგების კონკურენტი გახდა

Gucci-მ როიტერსს განუცხადა, რომ სხვა პროდუქტების წარმოებას იტალიაში გააგრძელებს. თუმცა ეს ნაბიჯი მიანიშნებს, რომ ჩინური წარმოება ევროპის სახელგანთქმულ დარგებში, მათ შორის, ძვირადღირებულ სამომხმარებლო საქონელსა და ავტომობილებში შედის.

შანხაიში ამერიკის სავაჭრო პალატის ყოფილმა პრეზიდენტმა კერ გიბსმა Fortune-ს განუცხადა: „ვფიქრობ, სიმბოლურად ჩინეთი უკვე მოვიდა. ის მხოლოდ იაფი და უხარისხო ნივთების წარმოების ადგილი აღარ არის“.

Apollo Global Management-ის მთავარმა ეკონომისტმა ტორსტენ სლოკმა ამ ცვლილებას „ჩინეთის მეორე შოკი“ უწოდა. 2000-იანი წლების დასაწყისში დასავლეთის ბაზრებზე ჩინური ტანსაცმელი, ავეჯი და ელექტრონიკა შევიდა. ახლა ჩინეთი ელექტრომობილებსა და სამრეწველო დანადგარებს ყიდის, რომლებიც ევროპულ მწარმოებლებს კონკურენციას უწევენ. ჩინურ ქარხნებს უკვე Gucci-ს მსგავსი ბრენდებისთვის მაღალი კლასის საქონლის წარმოებაც შეუძლიათ. Gucci-ს გაყიდვები ბოლო სამ წელიწადში განახევრდა, ხოლო მისმა მფლობელმა Kering-მა სუსტი მოთხოვნის გამო ფასები შეამცირა.

შვეიცარიის მართვის განვითარების საერთაშორისო ინსტიტუტის პროფესორმა ჰოვარდ იუმ Fortune-ს უთხრა, რომ ჩინეთი სამხრეთ კორეის, ტაივანისა და იაპონიის გზას მიჰყვება. მისი თქმით, ქვეყანა მაისურებისა და ცნობილი ბრენდების ასლებიდან საყოფაცხოვრებო ტექნიკაზე, ძვირადღირებულ ავტომობილებსა და სხვა პროდუქტებზე „უპრეცედენტო მასშტაბით“ გადავიდა.

იუს თქმით, ჩინეთმა ცოდნის დიდი ნაწილი ევროპისგან მიიღო. მაგალითად, ფოლკსვაგენი ჩინეთში ავტომობილებს 1980-იანი წლებიდან აწარმოებდა და მომწოდებლების თაობას დასავლური სტანდარტები ასწავლა. იუმ აღნიშნა: „როცა ჩინელი მომწოდებლები საკმარის შესაძლებლობებს იძენენ, უკეთესი მოგებისთვის საკუთარი ბრენდების შექმნას იწყებენ“.

ამავე დროს, ჩინეთში წარმოება კვლავ ევროპასა და აღმოსავლეთ აზიაზე იაფია. იაპონიის სავაჭრო სააგენტოს კვლევის თანახმად, შარშან ჩინეთის საწარმოო სექტორის მუშაკები თვეში საშუალოდ 629 დოლარს იღებდნენ. ტაივანში მაჩვენებელი 1 341 დოლარი, ხოლო სამხრეთ კორეაში 2 075 დოლარი იყო.

ყველაზე მეტად ცვლილება გერმანიამ იგრძნო. 2019 წლიდან ჩინეთის საექსპორტო საქონელი გერმანიისას დაემსგავსა და ძირითადად დანადგარებსა და ავტომობილებს მოიცავს. ევროპის ცენტრალური ბანკის ეკონომისტების ანალიზით, ეს თანხვედრა გერმანიაში ევროკავშირის ნებისმიერ სხვა ქვეყანაზე მეტად გაიზარდა.

გერმანიის სტატისტიკის სამსახურის მონაცემებით, შარშან გერმანიის ექსპორტი ჩინეთში 9,7%-ით შემცირდა, ხოლო იმპორტი 8,8%-ით გაიზარდა. ჩინეთთან გერმანიის სავაჭრო დეფიციტი მესამედით გაიზარდა. მხოლოდ ავტომობილების ექსპორტი მესამედით შემცირდა.

ეკონომისტებმა ბრედ სეტსერმა და სანდერ ტორდოირმა მაისში დაწერეს: „ჩინეთმა გერმანული მრეწველობის სადილის დიდი ნაწილი უკვე შეჭამა და ვახშმისთვის ემზადება“.