Crédit Agricole იტალიის შვილობილ კომპანიას Banco BPM-თან აერთიანებს

იტალიის საბანკო სექტორში მორიგი შერწყმა იგეგმება. ფრანგულ დიდ ბანკ Crédit Agricole-ს საკუთარი იტალიური შვილობილი ბანკის Banco BPM-თან გაერთიანება სურს. ორშაბათს ბანკმა განაცხადა, რომ მილანსა და ვერონაში სათავო ოფისების მქონე რეგიონულ ბანკში თავის წილს 29,6%-დან 45%-მდე გაზრდის.

გაერთიანების შედეგად იტალიაში სიდიდით მესამე ბანკი შეიქმნება, Intesa Sanpaolo-სა და UniCredit-ის შემდეგ. გაერთიანებულ ბანკს Banco BPM-ის ხელმძღვანელი ჯუზეპე კასტანია უხელმძღვანელებს. Crédit Agricole Banco BPM-ის სხვა აქციონერებს ერთმილიარდევროიანი სპეციალური დივიდენდით იზიდავს. ფრანგული ბანკის განმარტებით, გაერთიანება დაახლოებით 800 მილიონი ევროს სინერგიულ ეფექტსაც მოიტანს.

ჩრდილოეთ იტალიის რეგიონული ბანკის ხელში ჩაგდებას მანამდე Banca Monte dei Paschi (MPS) ცდილობდა. MPS-ს მისი შეძენა სურდა, რათა Intesa-ს მიერ თავად MPS-ის შესყიდვის მცდელობისთვის წინააღმდეგობა გაეწია. რომის მთავრობა მესამე მსხვილი საბანკო ჯგუფის შექმნას ისახავდა მიზნად და ამ პროცესში MPS-ს საკვანძო როლს ანიჭებდა.

თუმცა MPS-ის აქციონერებმა ოქტომბრის ბოლოს რიგგარეშე საერთო კრებაზე შესყიდვის გეგმა შეაჩერეს. უცნობია, როგორ უპასუხებს პრემიერ-მინისტრ ჯორჯა მელონის მთავრობა ფრანგების გეგმას. მთავრობას უფლება აქვს, ჩაერიოს შერწყმისა და შესყიდვის პროცესებში, რომლებსაც სტრატეგიულად მნიშვნელოვანად მიიჩნევს.

Banco BPM-ის შესყიდვით მანამდეც არაერთხელ დაინტერესებულან. თავად ბანკი 2017 წელს მილანის Banca Popolare di Milano-სა და ვერონის Banco Popolare-ს გაერთიანებით შეიქმნა. ორი წლის წინ UniCredit-მა გაერთიანებული ბანკის შესაძენად 10 მილიარდი ევრო შესთავაზა, თუმცა მოგვიანებით წინადადება უკან გაიწვია.

Crédit Agricole ევროპაში შესყიდვებს აქტიურად განაგრძობს, რადგან პარიზული ბანკი საფრანგეთში ფილიალების საქმიანობაზე დამოკიდებულების შემცირებას ცდილობს. გერმანიაში ფრანგული ბანკი ახლა დიუსელდორფის საშუალო ბიზნესის ბანკ IKB-ის შესყიდვას ცდილობს.