ჩინეთში საბითუმო ინფლაცია ოთხ წელზე მეტი ხნის მაქსიმუმზე ავიდა

ჩინეთში მწარმოებელთა ფასები 2022 წლის ივნისის შემდეგ ყველაზე სწრაფი ტემპით გაიზარდა. ზრდა ზედიზედ მესამე თვეა ჩქარდება.

ოქტომბერში მწარმოებელთა ფასების ინდექსმა 5,7% შეადგინა. როიტერსის მიერ გამოკითხული ეკონომისტები 5,3%-იან მაჩვენებელს ელოდნენ. ზრდა სამთო-მოპოვებით და ნედლეულის მრეწველობაში ფასების მკვეთრმა მატებამ განაპირობა.

Pinpoint Asset Management-ის პრეზიდენტმა და მთავარმა ეკონომისტმა ჟანგ ჭივეიმ სი-ენ-ბი-სი-ის გადაცემაში „Squawk Box Asia“ განაცხადა, რომ ზრდა საგარეო მოთხოვნის მკვეთრმა გაძლიერებამ გამოიწვია.

ჩინეთში სამომხმარებლო ინფლაცია ოქტომბერში 0,7%-მდე შენელდა. ეს ბოლო ორი თვის განმავლობაში, როცა მაჩვენებელი იზრდებოდა, პირველი შენელება იყო.

მაჩვენებელი როიტერსის მიერ გამოკითხული ეკონომისტების 0,8%-იან პროგნოზს ჩამორჩა. ის სექტემბრის 0,9%-ზე დაბალი იყო.

საბაზისო ინფლაციამ, რომელშიც სურსათისა და ენერგიის ფასები გათვალისწინებული არ არის, 0,8% შეადგინა. წინა თვეში ეს მაჩვენებელი 1% იყო.

ჩინეთის სტატისტიკის ეროვნული ბიუროს ურბანული განყოფილების მთავარმა სტატისტიკოსმა დონგ ლიჟუანმა აღნიშნა, რომ სამომხმარებლო ფასების ზრდას კვლავ ბენზინი განაპირობებდა. ფასების მატებაში ყველაზე დიდი წვლილი სწორედ ბენზინს ჰქონდა. თუმცა ეს სურსათზე ფასების მოსალოდნელზე მკვეთრმა ვარდნამ დააბალანსა.

ბოლო პერიოდში ჩინეთის ეკონომიკაში ზრდის გარკვეული ნიშნები გამოჩნდა. მესამე კვარტალში მან მოსალოდნელზე სწრაფად მოიმატა, სექტემბერში კი საცალო გაყიდვების ზრდამ პროგნოზს საგრძნობლად გადააჭარბა.

მონაცემების გამოქვეყნების შემდეგ ჩინეთის CSI 300-ის ინდექსი 0,56%-ით გაიზარდა.

Pinpoint-ის წარმომადგენელმა ჟანგმა თქვა, რომ უძრავი ქონების ბაზრის გამო შიდა მოთხოვნა საკმაოდ სუსტია. მისი თქმით, ეს ჩინეთში ინფლაციის ზრდის შეფერხების ერთ-ერთი მთავარი მიზეზია. „ამ სექტორში სტაბილიზაციის მკაფიო ნიშნები ჯერ არ ჩანს“, აღნიშნა მან. ჟანგის თქმით, ეს ვითარება შინამეურნეობების სამომხმარებლო განწყობასა და ადგილობრივი ხელისუფლებების შემოსავლებზე უარყოფითად მოქმედებს.

ჟანგმა განმარტა: „საერთო ეკონომიკური დინამიკა სუსტი იყო და აღდგენის მკაფიო ნიშნები ნამდვილად არ გამოჩენილა“.