ჩინეთის საჰაერო ძალებმა ტკივილგამაყუჩებელი ისრების მსროლელი დრონი შექმნეს

ჩინეთის სამხედრო-სამედიცინო სასწავლებელმა ახლახან შექმნა უპილოტო საფრენი აპარატი, რომელსაც წამლის დისტანციურად მიწოდება შეუძლია. მისი დახმარებით ფრონტის ხაზზე დაჭრილ ჯარისკაცებს სამედიცინო პერსონალის საფრთხეში ჩაგდების გარეშე უმკურნალებენ. ჩინეთის ხელისუფლების მხარდამჭერი გამოცემა „გლობალ თაიმსის“ ცნობით, საჰაერო ძალების სამედიცინო უნივერსიტეტმა სახალხო-განმათავისუფლებელი არმიისთვის (PLA) დაჭრილების საძიებლად განკუთვნილი პირველი დრონი შექმნა. ის ტკივილგამაყუჩებლით დატენილ ისრებს ისვრის, რათა დაჭრილ სამხედროებს ტკივილი შეუმსუბუქოს.

საჰაერო ძალების სამედიცინო უნივერსიტეტის წარმომადგენელმა ვან ძიანციმ გამოცემასთან საუბრისას განაცხადა: „ჩვენ შევქმენით სამხედროების პირველი დრონი დაჭრილების საძიებლად და მკურნალობაშიც გარკვეულ წინსვლას მივაღწიეთ. მაგალითად, დრონებით შეგვიძლია დაჭრილებს მნიშვნელოვანი მანძილიდან შევუყვანოთ წამალი. სადაც ჩვენი დრონი შეძლებს ფრენას, იქ დაჭრილის კუნთში სიცოცხლის გადასარჩენ გადაუდებელ წამალს მივაწვდით და მკურნალობისთვის ძვირფას დროს მოვიგებთ“.

რუსეთის მიერ უკრაინაში შეჭრის შემდეგ ფრონტის ხაზზე დრონებს ფართოდ იყენებენ, ძირითადად, სამიზნეების მოსაძებნად და გასანადგურებლად, ასევე დაზვერვისთვის. თუმცა, 12-წლიანი ომის ოთხწლიანი ესკალაციისას მათი გამოყენების ახალი გზები გამოჩნდა. მათ შორისაა ოპტიკურ-ბოჭკოვანი დრონები, რომლებსაც ჩახშობა ვერ აფერხებს, და მძიმე ტვირთის ამწევი ჰექსაკოპტერები, რომლებსაც სამედიცინო ევაკუაციისთვის იყენებენ. ამჟამად სამოქალაქო საჭიროებებისთვისაც ქმნიან დრონებს, რომლებიც პირველადი რეაგირების საშუალებად იმოქმედებენ. მათ შორისაა ხანძრის ჩასაქრობი და კამერიანი დრონები, ასევე „კამპუსის მფარველი ანგელოზის“ დრონები, რომლებიც სკოლებში თავდამსხმელების გასანეიტრალებლადაა შექმნილი.

ვანის თქმით, ჩინეთის საჰაერო-სახმელეთო სამედიცინო დრონი ჯერ ექსპერიმენტულ ეტაპზეა. პაციენტისთვის წამლის მიცემამდე საჭიროა სასიცოცხლო მაჩვენებლებისა და დაზიანებების შეფასება. გარდა ამისა, გარე დახმარების გარეშე რთულია, ზოგჯერ კი შეუძლებელია, უგონო მდგომარეობაში მყოფი ჯარისკაცის დრონზე მოთავსება. მიუხედავად ამისა, სამედიცინო დრონების გამოყენება ბრძოლის ველზე დახმარებას გააუმჯობესებდა. სამხედრო მედიცინაში მოქმედებს „ოქროს საათის“ კონცეფცია, რომლის თანახმადაც, დაჭრილებს გადარჩენის ყველაზე დიდი შანსი აქვთ, თუ მკურნალობას პირველი საათის განმავლობაში დაიწყებენ.

ბრძოლის ველზე სამედიცინო დახმარებას ჯერ კიდევ 1800-იანი წლებიდან იყენებდნენ, განსაკუთრებით ნაპოლეონის რუსეთში შეჭრისა და ამერიკის სამოქალაქო ომის დროს. თუმცა, დაჭრილების ვერტმფრენით ევაკუაცია პირველად მეორე მსოფლიო ომის დროს, ბირმასა და ფილიპინებში დაიწყეს. კორეის ომის დროს გამოჩნდა MASH-ის, ანუ მობილური არმიის ქირურგიული ჰოსპიტლების დანაყოფები, რომლებმაც სამკურნალო პუნქტები ფრონტის ხაზთან უფრო ახლოს გადაიტანეს.