დეპრესიის სამკურნალო ახალი მოწყობილობა აშშ-ში გაიყიდება

დაახლოებით ყოველი მეექვსე ზრდასრული ამერიკელი ანტიდეპრესანტს იღებს. შვედური კომპანია ფლოუ ნეიროსაიენსი (Flow Neuroscience) თავის მოწყობილობას ტრადიციული მედიკამენტების ალტერნატივად წარადგენს. თუმცა, ამჟამინდელი ოთხნიშნა ფასის გამო, ფუტურისტული გარეგნობის მოწყობილობის პაციენტებში დამკვიდრებას შეიძლება დრო დასჭირდეს.

მოწყობილობას შუბლზე დღეში 30 წუთით იკეთებენ და აპლიკაციით მართავენ. ის დაბალი ინტენსივობის ელექტრულ სტიმულაციას ტვინის მარცხენა შუბლის წილში გადასცემს. ეს უბანი განწყობისა და ემოციების რეგულირებაში მონაწილეობს. დეპრესიის მქონე ადამიანებში ტვინის ამ ნაწილში აქტივობა და ნერვული კავშირები, როგორც წესი, უფრო სუსტია.

აშშ-ის სურსათისა და მედიკამენტების ადმინისტრაციამ (Food and Drug Administration) Flow-ს ნებართვა გასული წლის დეკემბერში მისცა. მისი მოწყობილობა იმ ახალი თაობის ტარებად მოწყობილობებს შორისაა, რომლებიც ტვინის აქტივობას აკვირდებიან, აღრიცხავენ ან ასტიმულირებენ. მაგალითად, კალიფორნიულმა კომპანიამ კოგნიქსიონმა (Cognixion) Apple Vision Pro შეცვალა და დამბლის მქონე ადამიანებისთვის საკომუნიკაციო სისტემა შექმნა, რომელიც მეტყველებასა და მოძრაობის კონტროლზე დამოკიდებული არ არის. მიუზის (Muse) თავსაბურავი მედიტაციის გაუმჯობესებას ჰპირდება, ხოლო ელემაინდის (Elemind) მოწყობილობა ადამიანებს სწრაფად დაძინებაში უნდა დაეხმაროს.

Flow-ს მოწყობილობა ტვინის იმავე ნაწილზე მოქმედებს, რომელზეც ტრანსკრანიალური მაგნიტური სტიმულაცია, ანუ TMS. დეპრესიის მკურნალობის ეს დამტკიცებული მეთოდი ნეირონების გასააქტიურებლად მაგნიტურ ველებს იყენებს. TMS-ის მისაღებად პაციენტები კლინიკაში უნდა მივიდნენ. მკურნალობის სრული კურსი, ჩვეულებრივ, რამდენიმე კვირის განმავლობაში კვირაში ხუთ სეანსს მოიცავს. დაზღვევის გარეშე სრული კურსის ღირებულებამ შეიძლება 15 000 დოლარს მიაღწიოს.

Flow-ს აღმასრულებელმა დირექტორმა დანიელ მონსონმა, რომელიც კომპანიის თანადაფუძნებამდე კლინიკური ფსიქოლოგი იყო, განაცხადა, რომ პაციენტებისთვის უფრო მოსახერხებელი საშუალების შექმნა სურდა. მონსონმა თქვა: „პრობლემაზე რეალური გავლენისთვის უნდა შექმნა ისეთი რამ, რომელიც ტვინზე საჭირო ზემოქმედებას ახდენს, თუმცა სახლის გარემოში უსაფრთხოდ და ეფექტიანად გამოყენებაც შესაძლებელია“.

მძიმე დეპრესიული აშლილობის მქონე 174 ადამიანის კვლევაში, Flow-ს მოწყობილობის მიმღებ მონაწილეთა 45%-ს სიმპტომები 10 კვირაში გაუქრა. საკონტროლო ჯგუფში, რომელმაც მოჩვენებითი მოწყობილობა მიიღო, იგივე შედეგი 22%-ს ჰქონდა. კვლევაში მონაწილეობდნენ როგორც ანტიდეპრესანტების მიმღები ადამიანები, ისე ისინი, ვინც მათ არ იღებდა. მონსონის თქმით, ეს ადასტურებს, რომ სამედიცინო ზედამხედველობით მოწყობილობის გამოყენება მედიკამენტებთან ერთადაც შეიძლება.