დეველოპერმა Adobe-ის პროგრამების უფასო ანალოგები Claude-ით შექმნა

Adobe-ის დომინირება შემოქმედებითი პროგრამების ბაზარზე ახალი ამბავი არ არის. კომპანია ათწლეულების განმავლობაში ინდუსტრიულ სტანდარტად რჩება და მასზე მუშაობის მთელი პროცესებია დამოკიდებული. Reddit-ის მომხმარებელს სურდა, თითოეული პროდუქტის ნაცნობი განლაგებისა და ფუნქციების მქონე ღია კოდის ვერსია შეექმნა. მისი გეგმით, პროგრამებს ერთი თვის განმავლობაში Adobe-ის პროდუქტებთან 100%-იანი შესაბამისობისთვის უნდა მიეღწიათ. შემქმნელი GitHub-ის საცავებში არაერთხელ უსვამს ხაზს, რომ ყველა პროექტი Rust-ზე ააგო.

Adobe-ის პროდუქტების უფასო ალტერნატივები მრავლადაა, თუმცა მათი განლაგება და სამუშაო პროცესები ხშირად მნიშვნელოვნად განსხვავდება. Affinity Photoshop-ს წარმატებით უწევს კონკურენციას. მიუხედავად ამისა, Affinity-ის შესწავლას დრო სჭირდება და ის Adobe-ის მსგავს ინტეგრირებულ პროგრამულ ნაკრებს არ სთავაზობს მომხმარებლებს. როგორც ჩანს, დეველოპერის მიზანი ერთიანი გამოცდილების შექმნაა და არა სხვადასხვა შემქმნელის მიერ აგებული რამდენიმე უფასო პროგრამის გამოყენება.

დეველოპერი ხელოვნური ინტელექტის ინტეგრაციაზეც მუშაობს. პროგრამები თავიდანვე ხელოვნური ინტელექტის აგენტებისთვისაა გამიზნული. ხელოვნურ ინტელექტს ხელსაწყოებისა და მენიუების გამოყენება JSON-ის მართვის არხისა და MCP სერვერის საშუალებით შეუძლია. ჩანაფიქრის თანახმად, მომხმარებლები ხელოვნურ ინტელექტს უშუალოდ ამ პროგრამებში ნამუშევრების შექმნის საშუალებას მისცემენ.

პროექტს არაერთგვაროვანი გამოხმაურება მოჰყვა. ზოგი მომხმარებელი დეველოპერს Adobe-ისგან ქურდობაში ადანაშაულებს და სასამართლო დავის შესახებ აფრთხილებს. ამის პასუხად სხვები აცხადებენ, რომ პროგრამები დამოუკიდებლად, სუფთა გარემოში ხელახლა შეიქმნა და მათი აგებისას Adobe-ის საწყისი კოდი არ გამოუყენებიათ ან გადაუწერიათ. ერთმა კომენტატორმა X-ზე გამოქვეყნებულ პოსტს, რომელშიც დეველოპერის Reddit-ის კომენტარი იყო გაზიარებული, სარკასტულად უპასუხა: „რაღაც მართლაც შესანიშნავი ხდება: მეკობრეობა“. სხვები პროექტს მხარს უჭერენ და ამბობენ, რომ Adobe თავის საეჭვო ბიზნესპრაქტიკების გამო ამას იმსახურებს.

სკეპტიკოსები ხელოვნური ინტელექტის დახმარებით სწრაფად შექმნილი პროგრამული უზრუნველყოფის უსაფრთხოებაზეც მიუთითებენ. ერთმა ადამიანმა ძალიან მოკლე დროში რამდენიმე პროგრამისთვის, სავარაუდოდ, ასობით ათასი ხაზი კოდი შექმნა. გუნდის გარეშე მომუშავე დეველოპერისთვის ამ კოდის შემოწმება უკიდურესად რთული ამოცანაა. Sonar-ის 2026 წლის State of Code Developer Survey-ის ფარგლებში 1 100 სპეციალისტი გამოიკითხა. კვლევის შედეგებით, დეველოპერების 96% ხელოვნური ინტელექტის მიერ შექმნილ კოდს სრულად არ ენდობა. შესაძლო პრობლემებს შორის კონფიდენციალურობის დარღვევა, მავნე კოდი და ფაილების სახიფათო დამუშავება სახელდება.