დიდი სლემის ექვსგზის ჩემპიონმა სოლსბერიმ კარიერა დაასრულა

სოლსბერიმ ბოლო ტურნირად ამ თვის აშშ-ის ღია პირველობა აირჩია. მან ნახევარფინალს თავის დიდი ხნის მეწყვილე რაჯივ რამთან ერთად მიაღწია, რომელმაც ასევე კარიერის დასრულება გადაწყვიტა.

ადგილი სიმბოლური იყო. 2023 წელს სოლსბერი და რამი ისტორიაში პირველი წყვილი გახდნენ, რომელმაც აშშ-ის ღია პირველობის კაცთა წყვილთა თანრიგის ტიტული ზედიზედ სამჯერ მოიგო.

სოლსბერი ღია ეპოქაში გაერთიანებული სამეფოს ყველაზე წარმატებული ჩოგბურთელია კაცთა წყვილთა თანრიგში. მან რამთან ერთად 2020 წლის ავსტრალიის ღია პირველობაც მოიგო. დეზირე კრავჩიკთან ერთად კი შერეულ წყვილთა თანრიგში ორი ტიტული მოიპოვა.

34 წლის სოლსბერიმ თქვა, რომ მომავალზე გარკვეული ხანი ფიქრობდა და ახლა გადაწყვეტილებით ძალიან ბედნიერია.

მან Instagram-ზე დაწერა: „რამდენადაც მახსოვს, ჩოგბურთი ყოველთვის ჩემი ცხოვრება იყო. წარმოუდგენლად გამიმართლა, რომ ყველა ეს შესაძლებლობა, გამოცდილება და წარმატება მქონდა.

მსოფლიოში მოგზაურობა და ჩოგბურთის თამაშის საკუთარ სამსახურად ქცევა ახდენილი ოცნება იყო. არასდროს მჯეროდა, რომ ასეთი ცხოვრებით ვიცხოვრებდი და ასეთი კარიერა მექნებოდა.

ყველაფერი გავიღე და ვიცი, რომ შემიძლია ვიამაყო და წარსულს სინანულის გარეშე გადავხედო“.

სოლსბერიმ ამ წლის დასაწყისში სამთვიანი შესვენება აიღო. მან მანამდე BBC Sport-ს მოუყვა შფოთვის შესახებ, რომელიც ტურნირებზე აწუხებდა.

სოლსბერის თქმით, ეს მის თამაშზე დიდ გავლენას არ ახდენდა. თუმცა, შფოთვა მას შიშის განცდას უჩენდა და მუდმივ მგზავრობას გაცილებით ნაკლებად სასიამოვნოს ხდიდა.

სოლსბერიმ კარიერა პროფესიულ ტურნირებზე მოპოვებული 17 ტიტულით დაასრულა. მათ შორისაა 2022 და 2023 წლების სეზონის შემაჯამებელი ATP-ის ფინალები.