DoorDash-ი Instacart-ს 17 მილიარდ დოლარად ყიდულობს

შეთანხმება DoorDash-ს ონლაინ სასურსათო მიწოდების ბაზარზე Amazon-სა და Walmart-თან კონკურენციაში დაეხმარება.

DoorDash-მა განაცხადა, რომ Instacart-ს დაახლოებით 17 მილიარდ დოლარად ყიდულობს. შესყიდვა DoorDash-ს ონლაინ სასურსათო მიწოდების სფეროში უფრო დიდ წილს მოუტანს. ეს შესაძლებელი გახდება Instacart-ის უკვე ჩამოყალიბებული სასურსათო ბაზრისა და საცალო ვაჭრობის პარტნიორების წყალობით. Instacart-ის აღმასრულებელი დირექტორის, კრის როჯერსის თქმით, შეთანხმება მილიონობით ოჯახისთვის „ონლაინ სასურსათო შოპინგს უფრო მარტივსა და ხელმისაწვდომს გახდის“.

DoorDash-ის ცნობით, შესყიდვის შედეგად Instacart-ის მომხმარებლებს დამატებით 50 000-ზე მეტ მაღაზიაში შესვლა შეეძლებათ. DashPass-ისა და Instacart Plus-ის წევრები კი „ერთი სააბონენტო გადასახადის გადახდას შეძლებენ ორის ნაცვლად“. შეთანხმების დასრულება, როგორც მოსალოდნელია, „2027 წლის ბოლოს ან 2028 წლის პირველ ნახევარში“ მოხდება. ამისთვის მარეგულირებლების თანხმობა და სხვა პირობების შესრულება იქნება საჭირო. DoorDash-ის თქმით, გარიგების დასრულების შემდეგ Instacart-ის ბრენდს, ბიზნესისთვის განკუთვნილ ტექნოლოგიურ პროდუქტებსა და აპს შეინარჩუნებს. ასე რომ, სერვისები ცალკე დარჩება და ერთ პლატფორმად არ გაერთიანდება.

DoorDash-მა განაცხადა, რომ გარიგების დასრულების შემდეგ ადგილობრივი სასურსათო მაღაზიები პლატფორმის ექსკლუზიურობით შეზღუდული არ იქნებიან და ორივე მიტანის სერვისთან თანამშრომლობას შეძლებენ. Instacart-ის მყიდველებს სამუშაო საათებისა და შეკვეთების არჩევის თავისუფლება შეუნარჩუნდებათ. მათ შეეძლებათ თავად გადაწყვიტონ, DoorDash-ის შეკვეთებიც მიიღონ თუ მხოლოდ Instacart-ისთვის განაგრძონ პროდუქტების შერჩევა.

DoorDash-ი, რომელიც რესტორნებიდან საკვების მიმტან სერვისად დაიწყო, უკვე ფლობს სასურსათო პროდუქტების მიტანის საკუთარ ბიზნესს. თუმცა, ამ სფეროში მას მუდმივად უწევს კონკურენცია Instacart-თან, Uber-თან, Walmart-თან და Amazon-თან. DoorDash-ს საქმიანობის კიდევ უფრო დივერსიფიკაციის მოტივიც აქვს, რადგან მისი კონკურენტები იმ საკვების მიტანის ბაზარზეც შევიდნენ, რომლითაც DoorDash-ი ყველაზე მეტადაა ცნობილი. Uber-მა Postmates-ი შეიძინა, ხოლო Delivery Hero-მაც გადადგა მსგავსი ნაბიჯი.

„სასურსათო პროდუქტების საყიდლად ხალხის უმეტესობა კვლავ მაღაზიებში დადის, თუმცა სულ უფრო მეტი ადამიანი ყიდულობს პროდუქტებსა და ყოველდღიური მოხმარების ნივთებს ონლაინ. მომხმარებლები სწრაფ და ხელმისაწვდომ მიწოდებასა და შეკვეთის მარტივ გზას ელიან. უმსხვილესი ონლაინ საცალო მოვაჭრეები და სასურსათო ქსელები წინ მიიწევენ და საკუთარ მიტანის ფლოტებს, საწყობებს, წევრობის პროგრამებსა და ხელოვნური ინტელექტის საყიდლების ასისტენტებს ქმნიან. დაბალ მოგებაზე მომუშავე სასურსათო მაღაზიას ან საცალო მოვაჭრეს ამ ყველაფრის მარტო შექმნა არ შეუძლია. ხელოვნური ინტელექტის განვითარებასთან ერთად, არსებობს რისკი, რომ კონკურენციის პირობები ადგილობრივი ბიზნესის საზიანოდ კიდევ უფრო შეიცვალოს“.