დრონებით დარტყმების შემდეგ „იანდექსმა“ მონაცემების თითქმის 3% დაკარგა

„იანდექსმა“ (Yandex), რომელსაც ზოგჯერ „რუსულ გუგლს“ უწოდებენ, დრონებით დარტყმების შედეგად მონაცემთა ცენტრების მასშტაბური დაზიანების შემდეგ მომხმარებლებს განახლებული ინფორმაცია მიაწოდა. ამ კვირაში გამოქვეყნებულ ბლოგპოსტში კომპანიის ღრუბლოვანი სერვისების განყოფილებამ განაცხადა, რომ „მომხმარებელთა მონაცემების 97%-ზე მეტზე წვდომა აღადგინა“ [მანქანური თარგმანი]. ერთი შეხედვით, ეს დიდი წარმატებაა, თუმცა, როგორც The Register-მა აღნიშნა, წვრილ შრიფტში ნათქვამია, რომ „დარჩენილი 2,84%-ის აღდგენა აღჭურვილობის კრიტიკული დაზიანების გამო შეუძლებელია“.

უკრაინული დრონები „იანდექსის“ მონაცემთა ცენტრებს უკვე რამდენიმე კვირაა ესხმიან თავს. გასულ თვეში ჩვენ დავწერეთ ცნობებზე, რომ ინტერნეტში ტროლების აქტივობა მკვეთრად შემცირდა და ონლაინგადახდის სისტემა შეფერხდა. ამ დროისთვის ცნობილია „იანდექსის“ სულ მცირე სამი ობიექტი, რომლებიც უკრაინული დრონებით დარტყმების შედეგად დაზიანდა.

„იანდექსის“ ბოლო ბლოგპოსტში, როგორც ჩანს, მონაცემების იმ მცირე ნაწილის აღუდგენლობაში, რომელიც მომხმარებლებმა დაკარგეს, პასუხისმგებლობა მათვე ეკისრებათ, რადგან სარეზერვო ასლები არ შეუქმნიათ. იმ 2,84%-ზე საუბრისას, რომლის აღდგენაც შეუძლებელია, პოსტში ნათქვამია, რომ ამის ერთ-ერთი მიზეზი „პლატფორმაზე მომხმარებლების სარეზერვო ასლების არქონა“ იყო. კომპანიის თქმით, მათ, ვინც „იანდექს ქლაუდის“ სარეზერვო ასლების შექმნის ხელსაწყოები გამოიყენა, „მონაცემები არ დაუკარგავთ“.

ახლა „იანდექსმა“ სარეზერვო ასლების პოლიტიკა შეცვალა. კომპანიის განცხადებით, „ამჟამად „იანდექს ქლაუდში“ შექმნილ ყველა ვირტუალურ მანქანას სარეზერვო ასლების ფუნქცია ნაგულისხმევად ჩართული აქვს“. მაშინაც კი, თუ პუტინი უკრაინის წინააღმდეგ ომის დასრულებას გადაწყვეტს, სარეზერვო ასლების ნაგულისხმევად შექმნის პოლიტიკის შენარჩუნება შესაძლოა სასარგებლო იყოს. მომხმარებლებს ღრუბლოვანი სერვისის გარდა საკუთარი მონაცემების სარეზერვო ასლების შექმნის სისტემების გამოყენებასაც ურჩევენ. მაგალითად, 3-2-1 სტრატეგიის მიხედვით.

„იანდექსი“ ახალ ადგილას ru-central1-f ხელმისაწვდომობის ზონასაც ხსნის. მისი მიზანი ღრუბლოვანი სერვისის გაუმართაობისადმი მდგრადობისა და კატასტროფებისგან დაცვის გაუმჯობესებაა. ამ ეტაპზე ru-central1-f-ის სერვერებს უფრო შეზღუდული მომსახურებების შეთავაზება შეეძლებათ. „იანდექსს“ ახლადგახსნილი მონაცემთა ცენტრის ადგილმდებარეობის შესახებ ინფორმაცია არ გაუზიარებია.