ელვისისა და ემინემის მუსიკის უფლებების მფლობელები Suno-ს უჩივიან

Suno ხელოვნური ინტელექტით შექმნილი მუსიკალური კლონების გამო კიდევ ორ სარჩელს მიიღებს.

ელვის პრესლის მუსიკის უფლებების მფლობელთა ჯგუფი და ემინემის რამდენიმე ყველაზე ცნობილი ჩანაწერის გამომცემელი ხელოვნური ინტელექტის მუსიკალურ კომპანიას უჩივიან. ისინი ამტკიცებენ, რომ კომპანია უკანონოდ ქმნის მუსიკასა და ტექსტებს, რომლებიც ამ შემსრულებლებს ჰგავს. პრესლის საქმეში მისი უფლებების მფლობელთა ადვოკატები ამტკიცებენ, რომ Suno-მ დაარღვია ტენესის კანონი, რომელსაც „ელვისის კანონს“ უწოდებენ. კანონი ხელოვნური ინტელექტის კომპანიას მომღერლის ხმის კლონირებას უკრძალავს.

სარჩელში პრესლის უფლებების მფლობელთა ადვოკატები წერენ: „Suno-მ მექანიკურად მიითვისა შემსრულებლების იდენტობა, შრომა, შემოქმედება და დრო და ეს ყველაფერი სტაბილური, მსხვილი შემოსავლის მისაღებად გამოიყენა“.

ეს სარჩელები ჰგავს ჯეისონ ისბელისა და სხვების მიერ სექტემბერში შეტანილ სარჩელს. მასში მოსარჩელეები ამტკიცებდნენ, რომ Suno-მ მათი მიბაძვით მუსიკა შექმნა, თუმცა პირდაპირ საავტორო უფლებების დარღვევას არ უჩიოდნენ.

სარჩელის სხვა ნაწილში ადვოკატები წერენ: „Suno-ს დაუნდობელი რბოლა უმდაბლესი ხარისხისკენ ადამიანური შემოქმედების მოძველებას ისახავს მიზნად. კომპანია ლიცენზიის გარეშე, წამებში იმეორებს იმას, რომლის სწავლას, დაუღალავ შრომას, შენარჩუნებასა და გაუმჯობესებას წლები სჭირდება“.

Suno-ს წარმომადგენელმა კეტ მაკკორმაკმა ვერჯის განუცხადა: „Suno ადამიანებს ახალი, ორიგინალური მუსიკის შექმნაში ეხმარება და არავის სახელით ან მსგავსებით სარგებლობას არ ცდილობს. ჩვენ ნებისმიერი შემსრულებლის ნამუშევრის უნებართვო გამოყენებას ვკრძალავთ. ამის თავიდან ასაცილებლად, მომხმარებლებს კონკრეტული შემსრულებლებისა და სიმღერების მითითებას არ ვაძლევთ. ასევე, მესამე მხარის მომწოდებლებთან ერთად ვამოწმებთ ატვირთულ აუდიოფაილებსა და ტექსტებს, რათა შესაძლო ბოროტად გამოყენება აღმოვაჩინოთ. მუდმივად ვაუმჯობესებთ დაცვის მექანიზმებს და კვლავ დავამატებთ ახალ გარანტიებს, რომლებიც შემსრულებლებსა და ჩვენს მომხმარებლებს დაიცავს“.

ეს იმ სარჩელებს ემატება, რომლებსაც Suno ამჟამად Sony-ს, UMG-ის, ისბელის, Reservoir Media-სა და სხვებისგან იღებს.