Diamond Foundry-მა მსოფლიოში პირველი 200-მილიმეტრიანი ალმასის ფირფიტა შექმნა

ალმასს სითბოს გამტარობის გამორჩეული უნარი აქვს. მისი თბოგამტარობა სპილენძისაზე სულ მცირე ხუთჯერ მაღალია. ამის გამო, ლაბორატორიაში მოყვანილ ალმასებზე მომუშავე კომპანიამ Diamond Foundry-მ მსოფლიოში პირველი 200-მილიმეტრიანი ერთკრისტალური ალმასის ფირფიტის შექმნის შესახებ განაცხადა. 200-მილიმეტრიანი ფირფიტა დაახლოებით იმ ზომისაა, რომელსაც ნახევარგამტარების ქარხნები ძველი ტექნოლოგიური პროცესებისთვის იყენებენ. კომპანიის ვებსაიტზე ნათქვამია: „ერთკრისტალური ალმასი ფირფიტების მასშტაბის ეპოქაში შევიდა“. ეს მასშტაბური წარმოების მცდელობის ნაწილია, რათა ალმასი ნახევარგამტარების გასაგრილებლად გამოიყენონ. ხელოვნური ინტელექტის ჩიპების სიმძლავრის ზრდამ მათი გაგრილების სერიოზული პრობლემებიც გამოიწვია.

Diamond Foundry-ს 200-მილიმეტრიანი ფირფიტა სხვა ხელოვნურ ალმასებს იმით განსხვავდება, რომ ის მაღალი ხარისხის ერთკრისტალური ნაჭრისგან მზადდება და არა პოლიკრისტალური მასალისგან. ერთკრისტალური ალმასის დამზადება რთულია, თუმცა სწორედ ეს თვისება აძლევს მას განსაკუთრებულ თბოგამტარობას და ამავდროულად ელექტრულ საიზოლაციო თვისებებს უნარჩუნებს. ამ ეფექტიანობამ შესაძლოა შეამციროს ცხელი წერტილების წარმოქმნა, რის გამოც ერთკრისტალური ალმასი ხელოვნური ინტელექტის ჩიპების გასაგრილებლად კარგი გამოსავალია.

კომპანიამ გრაფიკიც აჩვენა, რომლის მიხედვითაც, 2030 წლამდე D300 ზომის ერთკრისტალური ალმასის ფირფიტის შექმნა შესაძლებელი უნდა გახდეს. მისი ზომა მოწინავე ტექნოლოგიური პროცესების ფირფიტების ზომას დაემთხვევა. თუმცა კომპანიის მიერ ნაჩვენები ნიმუში ჯერ გაპრიალებული არ არის და ჩიპების მწარმოებლებისთვის გამოსადეგად ქცევამდე დამატებით დამუშავებას საჭიროებს.

კომპანია 2012 წელს დაარსდა, თუმცა მან ასევე აღნიშნა იმ მეცნიერების შრომა, რომლებიც 2000-იანი წლების დასაწყისიდან ერთკრისტალური ალმასის ზომის გაზრდის პრობლემაზე მუშაობდნენ. Diamond Foundry-ს აღმასრულებელმა დირექტორმა მარტინ როშაიზენმა თქვა: „ეს ერთ-ერთი იმ ეტაპთაგანია, რომელიც ოდესღაც თითქმის შეუძლებლად ჩანდა. ასობით ინჟინერმა, მეცნიერმა და ტექნიკოსმა შეიტანა წვლილი იმაში, რომ აქამდე მოვსულიყავით. ეს ათწლეულზე მეტი ხნის განმავლობაში ჩატარებული უამრავი ექსპერიმენტის, მარცხის, გამოგონების, ხელახლა აწყობილი მანქანებისა და აღმოჩენების ჯამური შედეგია“.

„შტეფანი და მარტინი ამ მიზანს 25 წელი მისდევდნენ. ტექნოლოგიაში ძალიან ცოტა მაგალითია, როცა ვინმე ასეთი გამძლეობით ეჭიდება რთულ სამეცნიერო გამოწვევას. ისინი მაშინაც განაგრძობდნენ მუშაობას, როცა გავრცელებული შეხედულებით, ამ ზომის ერთკრისტალური ალმასის დამზადება უბრალოდ შეუძლებელი იყო. დღეს ამ გამძლეობის შედეგი პირველი D200-მილიმეტრიანი ერთკრისტალური ალმასია. რაც მთავარია, D300-მილიმეტრიანი ზომის მიღწევაც უკვე მოსალოდნელი ჩანს“.