ესტონეთი რუსი სპორტსმენების შეჯიბრებებზე დაშვებას კრძალავს

ესტონეთი ბოლო ქვეყანაა, რომელმაც განაცხადა, რომ უკრაინაში მიმდინარე ომის გამო რუს და ბელარუს სპორტსმენებს საკუთარ ტერიტორიაზე შეჯიბრებებში მონაწილეობის უფლებას არ მისცემს.

მსგავსი განცხადებები მანამდე ნორვეგიამ, ფინეთმა და კანადამ გააკეთეს.

ეს გადაწყვეტილებები რუსეთისა და ბელარუსის სპორტსმენების შეჯიბრებებში დაბრუნების გამო მზარდი უკმაყოფილების ფონზე მიიღეს.

სექტემბერში სათხილამურო სპორტის საერთაშორისო ფედერაციამ (FIS) წესები შეამსუბუქა და განაცხადა, რომ ამ ორი ქვეყნის სპორტსმენებს შეჯიბრებებში მონაწილეობა შეეძლებოდათ, „თუ ისინი ნეიტრალიტეტის დეკლარაციას ხელს მოაწერდნენ“.

მანამდე მათ სამხედრო სამსახურთან ნებისმიერი ნებაყოფლობითი კავშირის ან ანაზღაურებადი მოვალეობის შესახებ უფრო მკაცრ შემოწმებას უტარებდნენ.

მონაწილეობა კვლავ მხოლოდ ინდივიდუალურ შეჯიბრებებშია დაშვებული. სპორტსმენებს ეროვნული სიმბოლოების, მაგალითად, დროშის, ჰიმნისა თუ ფორმის გამოყენება ეკრძალებათ.

ახლა გაირკვა, რომ ესტონეთის მთავრობამ FIS-ს მისწერა და განაცხადა, რომ რუსი და ბელარუსი სპორტსმენების შეჯიბრებებში დაშვება უკრაინის მხარდაჭერას დააზიანებდა და პროპაგანდისთვის ხელსაყრელ შესაძლებლობას შექმნიდა.

ბი-ბი-სი სპორტისთვის გაგზავნილ განცხადებაში FIS-მა აღნიშნა, რომ „სრულად უჭერს მხარს სპორტსმენებს, ეროვნული სათხილამურო ასოციაციებისა და ადგილობრივ ორგანიზატორებს, რომელთა უმეტესობასთანაც დიდი ხნის ურთიერთობა აკავშირებს, იმ პროცესში, რომელიც, როგორც ვიცით, ძალიან რთულია“.

FIS-მა დასძინა: „ამასთან, ინდივიდუალური ნეიტრალური სპორტსმენის პოლიტიკაში მკაფიოდ წერია, რომ სპორტსმენის მონაწილეობის უფლების მიუხედავად, მასპინძელი ქვეყნის სავიზო და ქვეყანაში შესვლის წესები ძალაში რჩება და მათ მხოლოდ მასპინძელი ქვეყანა განსაზღვრავს. FIS პასუხისმგებლობას არ იღებს იმ პირისთვის ვიზის ან ქვეყანაში შესვლის უარყოფაზე, რომელსაც FIS-ის ინდივიდუალური ნეიტრალური სპორტსმენის პოლიტიკის თანახმად მონაწილეობის უფლება მიენიჭა“.

ხუთშაბათს სკანდინავიელმა მეზობლებმა, ნორვეგიამ და ფინეთმა, განაცხადეს, რომ უკრაინაში ომის გამო რუს სპორტსმენებს ვიზებს ისინიც არ მისცემენ.

ნორვეგია მომავალ თვეში სათხილამურო რბოლაში მსოფლიო თასის ეტაპს უმასპინძლებს, ფინეთში კი მარტში ფიგურულ სრიალში მსოფლიო ჩემპიონატი უნდა ჩატარდეს. ციგურაობის საერთაშორისო კავშირმა (ISU) განაცხადა, რომ „მიიჩნევს, სპორტსმენები არ უნდა დაისაჯონ მათი მთავრობების ქმედებების გამო მსოფლიოში, სადაც, სამწუხაროდ, ბევრი კონფლიქტი მიმდინარეობს“. ორგანიზაციამ ასევე აღნიშნა, რომ ფინეთის ოფიციალური პირებისგან „განმარტებებს ითხოვდა“.