ევროკავშირი და ჩინეთი ჰიბრიდების ექსპორტზე შეთანხმდნენ

ევროკომისიისა და ჩინეთის ვაჭრობის სამინისტროს პარასკევ საღამოს გამოქვეყნებულ ერთობლივ განცხადებაში ნათქვამია: „ინტენსიური კონსულტაციების შემდეგ, ორივე მხარემ მსოფლიო სავაჭრო ორგანიზაციის წესების შესაბამისად ჰიბრიდული ავტომობილებით ვაჭრობაზე შეთანხმებას მიაღწია“. განცხადება ელექტრომობილების ტარიფებთან დაკავშირებით კომპრომისზეც მიანიშნებს.

ევროკავშირის ვაჭრობის კომისარმა მაროშ შეფჩოვიჩმა პეკინში გამართულ პრესკონფერენციაზე განმარტა, რომ შეთანხმება ევროკავშირში ჩინური ჰიბრიდული და დასამუხტი ჰიბრიდული ავტომობილების იმპორტს შეზღუდავს. მომდევნო ოთხ წელიწადში ჰიბრიდული და დასამუხტი ჰიბრიდული ავტომობილების იმპორტი წინა პროგნოზთან შედარებით განახევრდება. შეფჩოვიჩმა განაცხადა, რომ შეთანხმების შედეგად ევროპის ბაზარზე ჩინეთიდან „რამდენიმე მილიონით ნაკლები ავტომობილი“ შევა.

შეფჩოვიჩს არ დაუკონკრეტებია, რამდენი ავტომობილის ექსპორტის უფლება ექნება მომავალში ჩინეთს ევროკავშირში. მას არც ის განუმარტავს, როგორ შეედრება ეს რაოდენობა წლევანდელ იმპორტს. ევროკომისარმა შეკითხვის პასუხად შეთანხმების სხვა დეტალებიც არ გაამჟღავნა. შეფჩოვიჩის თქმით, გარიგებას თავდაპირველად ევროკავშირის ქვეყნების მთავრობის მეთაურებს წარუდგენს. მათ უნდა გადაწყვიტონ, მიიღებენ თუ არა ჩინეთთან მიღწეულ კომპრომისს.