გერმანიაში პოლონეთის Starlink-ის სადგურის დაწვის საქმეზე ორი პირი დააკავეს

პოლონური მხარის ცნობით, ცენტრალურ პოლონეთში ხანძარმა სადგურის ელექტრომომარაგების სისტემა და სათადარიგო გენერატორი გაანადგურა. ხელისუფლებამ მანამდე გამოთქვა ეჭვი, რომ ეს შესაძლოა მიზანმიმართული დივერსია ყოფილიყო. სავარაუდო მიზანი ინტერნეტკავშირის, მათ შორის, უკრაინის სამხედროების მიერ გამოყენებული კავშირის გაწყვეტა იყო.

პოლონეთის სადაზვერვო სამსახურების კოორდინაციის მინისტრმა ტომაშ სემონიაკმა პრესკონფერენციაზე განაცხადა: „ეჭვი არ გვეპარება, რომ ამ დივერსიის უკან რუსეთის სამსახურები დგანან“. მან დასძინა, რომ რუსეთის სამსახურები სულ უფრო ხშირად იყენებენ კრიმინალურ სამყაროსთან დაკავშირებულ პირებს.

ევროკავშირის რამდენიმე ქვეყნის წარმომადგენლები თვეებია, სავარაუდოდ, რუსეთის მიერ მოწყობილი დივერსიების, კიბერთავდასხმებისა და ჰიბრიდული ომის სხვა ფორმების შესახებ აფრთხილებენ. მოსკოვი ბრალდებებს უარყოფს და მათ უსაფუძვლო ანტირუსულ ისტერიად მოიხსენიებს.

ამერიკელი მეწარმის, ილონ მასკის, სატელიტური ინტერნეტის სერვისი Starlink უკრაინისთვის მნიშვნელოვან როლს ასრულებს. ეს მნიშვნელობა 2022 წლის თებერვალში რუსეთის შეჭრის დაწყების შემდეგ გაიზარდა. მასკმა მაშინ უკრაინაში სერვისი გაააქტიურა, როცა კიევის მთავრობამ დახმარება ითხოვა.

პოლონეთის განცხადებით, ქვეყანამ უკრაინის Starlink-ის გამოწერების ხარჯები დაფარა. ინტერნეტკავშირები უკრაინის კომუნიკაციისა და სამხედრო ინფრასტრუქტურისთვის ძალიან მნიშვნელოვანია.