Google-მა ხელოვნური ინტელექტით თამაშების შექმნის პლატფორმა გამოუშვა

Google-მა დღეს Playground წარადგინა. ეს ახალი პლატფორმა მომხმარებლებს ხელოვნური ინტელექტისთვის მიცემული მითითებებით ინდივიდუალური თამაშების შექმნის საშუალებას აძლევს. Playground დღესვე გახდება ხელმისაწვდომი აშშ-ში მცხოვრები 18 წლისა და უფროსი მომხმარებლებისთვის, მისამართზე playground.google.

კომპანია Playground-ს „ექსპერიმენტულ სათამაშო პლატფორმად“ აღწერს, რომელიც „შემოქმედებისთვის არსებულ ბარიერებს ამცირებს“ და პროგრამირების გამოცდილებას არ მოითხოვს. Google-მა ბლოგზე დაწერა: „Playground-ის სასაუბრო ინტერფეისით თამაშის მართვა მხოლოდ იმის აკრეფით შეგიძლიათ, რისი შექმნაც გსურთ. დაიწყეთ ცარიელი სივრციდან, გადააკეთეთ საწყისი მითითებები ან ჩანაფიქრის დასახვეწად ეტაპობრივი დახმარება გამოიყენეთ, შემდეგ კი შედეგი დაუყოვნებლივ გამოცადეთ. გსურთ ფიზიკის შეცვლა, წესების გადაწერა, პერსონაჟების მორგება ან გარემოს მთლიანად განახლება? უბრალოდ მოითხოვეთ. საწყისი ჩანაფიქრიდან საბოლოო დამუშავებამდე შემოქმედებით მიმართულებას სრულად თქვენ აკონტროლებთ“.

თამაშის შექმნის დასრულების შემდეგ მომხმარებელს მისი ბმულით გაზიარება ან „Playground Explore-ის გალერეაში“ გამოქვეყნება შეუძლია. ამ გზით თამაშს სხვებიც ითამაშებენ. „შერჩეულ ჟანრებს“ თამაშშიდა რეიტინგები და მრავალმომხმარებლიანი რეჟიმი ექნება. Google-ის ცნობით, გალერეა შეფასებებისა და მოთამაშეთა აქტივობის მიხედვით „ახალ, შემოქმედებით და სახალისო“ თამაშებს გამოკვეთს.

Playground-ის გამოყენება უფასოა. Google One-ის გამომწერებს თავიანთი გეგმის მიხედვით ყოველკვირეული ტოკენების უფრო მაღალი ზღვარი ექნებათ. Google-ის წარმომადგენელმა ნია კარტერმა ვერჯს განუცხადა, რომ Playground-ის საფუძველია „Google-ის არსებული საბაზისო მოდელები, Gemini, Nano Banana და Lyria, რომლებიც ჩვენს შიდა თამაშებსა და შეფასებებზე დახვეწილ სპეციალურ პროგრამულ სისტემასთანაა გაერთიანებული“.

Playground-ის დღევანდელ წარდგენასთან ერთად, Google და Unity ახალ ხელსაწყოს, Unity Spark-საც წარადგენენ. ხელოვნურ ინტელექტზე დაფუძნებული ეს გარემო პროფესიონალური დონის თამაშების შემუშავების ძრავას უფრო ჰგავს. ის მომხმარებლებს სხვებთან ერთად თამაშების ერთდროულად შექმნის საშუალებას აძლევს. Unity Spark-ით შექმნილი თამაშების Playground-ზე გაზიარება იქნება შესაძლებელი. Spark-ის დახურული საცდელი პროგრამა წელს მოგვიანებით დაიწყება. მსურველებს მოლოდინის სიაში ჩაწერა დღეიდან შეუძლიათ.

Google-ის განცხადებამდე ცოტა ხნით ადრე Meta-მ გამოაცხადა, რომ მომხმარებლებს მისი Horizon პლატფორმისთვის ხელოვნური ინტელექტით თამაშების შექმნის საშუალებას მისცემს. ამის გაკეთება ტელეფონებსა და ინტერნეტში იქნება შესაძლებელი. ახალი აპები ადრეული წვდომის რეჟიმში ეტაპობრივად გამოდის. ამ ხელსაწყოებით შექმნილი გამოქვეყნებული თამაშები Facebook-სა და Instagram-ზე რეკომენდაციებში შეიძლება გამოჩნდეს. ეს მათ უფრო ფართო აუდიტორიამდე მიაღწევინებს, ვიდრე მხოლოდ Horizon-ზე განთავსება. Roblox-მაც დაიწყო მომხმარებლებისთვის ტელეფონებითა და ხელოვნური ინტელექტით თამაშების შექმნის შესაძლებლობის მიცემა. ფუნქცია „Build“ რამდენიმე ქვეყანაში საჯარო ალფა-ტესტირების რეჟიმშია.