ჰუსიტების დარტყმების შემდეგ ნავთობის ფასმა ზრდა განაგრძო

ნავთობის ფასმა სამშაბათს ზრდა განაგრძო. გავრცელდა ცნობები საუდის არაბეთზე ჰუსიტების ახალი დარტყმებისა და სპარსეთის ყურეში გემებზე ირანის თავდასხმების შესახებ.

საერთაშორისო საორიენტაციო მარკის, Brent-ის, ნოემბრის მიწოდების ფიუჩერსები 1,25%-ით გაძვირდა და ბარელზე 107,00 დოლარს მიაღწია. აშშ-ის West Texas Intermediate-ის ოქტომბრის ფიუჩერსები 1,27%-ით, ბარელზე 102,68 დოლარამდე გაიზარდა.

საუდის არაბეთმა ჰორმუზის სრუტის შემოვლითი, უმნიშვნელოვანესი აღმოსავლეთ-დასავლეთის ნავთობსადენი დახურა. ერაყიდან გაშვებულმა დრონებმა ის დააზიანეს, რამაც ისედაც შეზღუდულ ბაზარზე ნავთობის მიწოდების შეფერხებები გაამწვავა.

ალ-ჯაზირას (Al Jazeera) ცნობით, იემენში საუდის არაბეთის ხელმძღვანელობით მოქმედმა კოალიციამ განაცხადა, რომ ორშაბათს 13 მშვიდობიანი მოქალაქე დაშავდა. მანამდე ჰუსიტურმა ძალებმა საუდის არაბეთის მიმართულებით ბალისტიკური რაკეტებითა და დრონებით მასშტაბური იერიშები მიიტანეს.

ამავე დროს, ირანის სამხედრო ძალებმა განაცხადეს, რომ ჰორმუზის სრუტის თავზე აშშ-ის მოწინავე დრონი გაანადგურეს. ამას წინ უძღოდა თეირანის მიერ სპარსეთის ყურეში აშშ-ის უპილოტო საზღვაო სისტემების წინააღმდეგ ჩატარებული ოპერაციების სერია. აშშ-ის პრეზიდენტმა დონალდ ტრამპმა კვირას განაცხადა, რომ აშშ-ს ირანის წინააღმდეგ კამპანიის გაგრძელება და მისი ნავთობის ხელში ჩაგდება შეეძლო.

აშშ-ის ცენტრალურმა სარდლობამ (CENTCOM) ასევე უარყო ისლამური რევოლუციის გვარდიის კორპუსის მტკიცება. გვარდიის თანახმად, პანამის დროშით მცურავი ნავთობმზიდი El Gaia ჰორმუზის სრუტეში საზღვაო ნაღმს დაეჯახა.

CENTCOM-მა განაცხადა: „პანამის დროშით მცურავ ნავთობმზიდ El Gaia-ს გასულ თვეში ირანული რაკეტა მოხვდა და მწყობრიდან გამოიყვანა. გვარდიის ცრუ მტკიცება მათი ტყუილებისა და დაშინების მცდელობების კიდევ ერთი მაგალითია, როდესაც ისინი სრუტეში კომერციული გემების მოძრაობის შეფერხებას ცდილობენ“.

Sri-Kumar Global Strategies-ის პრეზიდენტმა კომალ შრი-კუმარმა (Komal Sri-Kumar) სი-ენ-ბი-სის გადაცემაში „Squawk Box Asia“ განაცხადა, რომ ინფლაცია მოიმატებს, რადგან ნავთობსადენებზე თავდასხმები მიმდინარეობს და საუდის არაბეთის აღმოსავლეთ-დასავლეთის ნავთობსადენი დახურულია.

შრი-კუმარმა დასძინა: „გარდა ამისა, საბაჟო ტარიფების ომი საკმაოდ სწრაფად მწვავდება, რაც ფასებზე და, შესაბამისად, ობლიგაციების შემოსავლიანობაზე ზრდის ზეწოლას მოახდენს“.