ინგლისის ბანკი ფედის მსგავსად განაკვეთის ზრდას არ აპირებს

LSEG-ის მონაცემებით, ბაზარი 80%-ზე მეტ ალბათობას ანიჭებს იმას, რომ ცენტრალური ბანკი ხუთშაბათს საპროცენტო განაკვეთს უცვლელად დატოვებს. თუმცა ნოემბრის მომდევნო სხდომაზე განაკვეთის სულ მცირე 25 საბაზისო პუნქტით ზრდას ფართოდ ელიან.

განაკვეთის უცვლელად დატოვება სხვა წამყვანი ცენტრალური ბანკებისგან განსხვავებულ ნაბიჯს ნიშნავს. აშშ-ის ფედერალურმა სარეზერვო სისტემამ ოთხშაბათს განაკვეთი მეოთხედი პროცენტული პუნქტით გაზარდა. ეს 2023 წლის შემდეგ პირველი ზრდა იყო. ევროპის ცენტრალურმა ბანკმა გასულ კვირას განაკვეთი წელს მეორედ გაზარდა. მანამდე, ივნისში, ბანკმა განაკვეთი სამი წლის განმავლობაში პირველად გაზარდა. იაპონიის ბანკი, სავარაუდოდ, ორდღიანი სხდომის დასრულებისას, პარასკევს, ძირითად საპროცენტო განაკვეთს გაზრდის.

ინგლისის ბანკს წელს ძირითადი საპროცენტო განაკვეთი არ შეუცვლია. ბანკმა ის ბოლოს დეკემბერში, 25 საბაზისო პუნქტით შეამცირა.

ოთხშაბათს გამოქვეყნებულმა მონაცემებმა აჩვენა, რომ გაერთიანებულ სამეფოში ინფლაციის დონე აგვისტოში 3,1%-მდე გაიზარდა. მარტის შემდეგ მაჩვენებელმა 3%-ს პირველად გადააჭარბა.

გაერთიანებული სამეფოს ეროვნული სტატისტიკის ოფისმა (Office for National Statistics, ONS) განაცხადა, რომ მკვეთრი ზრდა უმეტესწილად საავტომობილო საწვავის გაძვირებამ გამოიწვია. საწვავის ღირებულება წლიურ ჭრილში 23%-ით გაიზარდა.

გაერთიანებული სამეფო ენერგიის წმინდა იმპორტიორია, ამიტომ გარე ენერგეტიკული შოკების მიმართ განსაკუთრებით მოწყვლადია. ქვეყანა კვლავ ებრძვის ცხოვრების გაძვირებით გამოწვეულ კრიზისს. ის პანდემიის შემდგომმა ინფლაციამ და ბუნებრივი აირის მიწოდებაზე რუსეთ-უკრაინის ომის გავლენამ გამოიწვია.

გლობალურ ინფლაციასთან დაკავშირებულმა შეშფოთებამ, პოლიტიკურმა არასტაბილურობამ და გაერთიანებული სამეფოს საბიუჯეტო პოლიტიკის მიმართ შიშმა წელს ბრიტანეთის სახელმწიფო ობლიგაციებზე ზეწოლა გააძლიერა. ეს ობლიგაციები „გილტების“ სახელითაა ცნობილი. გაერთიანებულ სამეფოს დიდი შვიდეულის ქვეყნებს შორის სესხების ყველაზე მაღალი ღირებულება აქვს. მისი გრძელვადიანი, 20 და 30-წლიანი ობლიგაციების შემოსავლიანობა 6%-იან ნიშნულს უახლოვდება.

ბრიტანულმა გაზეთმა The Telegraph-მა კვირის დასაწყისში გაავრცელა ინფორმაცია, რომ ინგლისის ბანკი 20 და 30-წლიანი ობლიგაციების გაყიდვის შეწყვეტის გეგმას გამოაცხადებდა. განცხადება საპროცენტო განაკვეთის შესახებ გადაწყვეტილებასთან ერთად გამოქვეყნდებოდა.

J.P. Morgan Personal Investing-ის საინვესტიციო სტრატეგმა სკოტ გარდნერმა თქვა, რომ ინფლაციის ზრდა „ინგლისის ბანკს საპროცენტო განაკვეთის დაუყოვნებლივ გაზრდაში, სავარაუდოდ, ვერ დაარწმუნებს“. თუმცა, მისი თქმით, ამან მონეტარული პოლიტიკის განმსაზღვრელ პირებს შორის ინფლაციის პერსპექტივის შესახებ ახალი შეშფოთება შეიძლება გამოიწვიოს.