ინგლისის ფეხბურთის ასოციაციამ და ქალთა სუპერლიგამ ჯვარედინი იოგის ტრავმებზე კვლევა დაიწყეს

ინგლისის ფეხბურთის ასოციაციამ და ქალთა სუპერლიგის ორგანიზაციამ (WSL Football) მნიშვნელოვანი კვლევითი პროექტი დაიწყეს, რათა უკეთ შეისწავლონ, რატომ იღებენ ქალ ფეხბურთელები წინა ჯვარედინი იოგის (ACL) ტრავმას და როგორ შეიძლება ასეთი შემთხვევების შემცირება.

ინგლისის ფეხბურთის ასოციაციის დაფინანსებით მიმდინარე სადოქტორო კვლევას ლონდონის საიმპერატორო კოლეჯთან და სპორტულ ორთოპედ სიმონ ბოლთან ერთად მკვლევარი ჰანა ლეჰტოვირტა უხელმძღვანელებს. მასში ქალთა სუპერლიგისა და WSL2-ის კლუბები ჩაერთვებიან.

ACL-ის ტრავმები ქალთა ფეხბურთის ერთ-ერთი ყველაზე სერიოზული პრობლემაა და ფეხბურთელებს ხშირად რამდენიმე თვით ჩამოშორებს თამაშს.

კვლევების თანახმად, ფეხბურთელ ქალებს ამ ტრავმის მიღების ალბათობა ორიდან ექვსჯერ მეტი აქვთ, ვიდრე კაც ფეხბურთელებს.

ბოლო წლებში ამ ტრავმა მიიღეს, მათ შორის, ვივიენ მიდემამ, ბეთ მიდმა, ლია უილიამსონმა და სემ კერმა.

წინა კვლევებში შესაძლო რისკფაქტორებად დასახელდა ანატომიური, ჰორმონული, ბიომექანიკური და გარემოს გავლენები. თუმცა, მკვლევრების თქმით, ნაკლებია ცნობილი იმის შესახებ, თუ როგორ ურთიერთქმედებს ეს ფაქტორები ელიტური ფეხბურთის ყოველდღიურობაში.

კვლევის მიზანია ქალთა ფეხბურთში ACL-ის ტრავმების ერთ-ერთი ყველაზე სრულყოფილი შესწავლა, რომელშიც სამეცნიერო მონაცემები ფეხბურთელებისა და პერსონალის გამოცდილებასთან გაერთიანდება.

კვლევაში მონაწილეობის მისაღებად ქალთა სუპერლიგისა და WSL2-ის ყველა კლუბის ფეხბურთელებს მიიწვევენ. ასევე ჩაერთვებიან სამედიცინო, ფიზიკური მომზადებისა და სამწვრთნელო პერსონალის წარმომადგენლები.

კვლევა ორ ეტაპად ჩატარდება.

პირველ ეტაპზე ფეხბურთელებს გამოკითხავენ, რათა შეაგროვონ მონაცემები ტრავმების ისტორიაზე, ვარჯიშისა და მატჩების დატვირთვაზე, ასევე ჰორმონულ, კვებით და ფსიქოლოგიურ ფაქტორებზე.

2018-19 წლების სეზონიდან ACL-ის ტრავმის მქონე ფეხბურთელების მონაცემებს იმ ფეხბურთელების მონაცემებს შეადარებენ, რომლებსაც ასეთი ტრავმა არ მიუღიათ.

მეორე ეტაპზე ფეხბურთელებსა და პერსონალს გაესაუბრებიან, რათა შეისწავლონ მათი შეხედულებები ACL-ის ტრავმებზე, ვარჯიშისა და პრევენციის ამჟამინდელ მიდგომებზე.

მკვლევრები იმედოვნებენ, რომ შედეგები ქალთა ფეხბურთში ტრავმების პრევენციის, რეაბილიტაციისა და ფეხბურთელთა კეთილდღეობის მომავალ სტრატეგიებს განსაზღვრავს.

2025 წლის აპრილში ფიფამ განაცხადა, რომ ისიც აფინანსებდა კვლევას, რომელიც შეისწავლის, შეიძლება თუ არა მენსტრუალური ციკლის დროს ჰორმონულმა ცვლილებებმა ქალ ფეხბურთელებში ACL-ის ტრავმების გახშირებას შეუწყოს ხელი.