ფორმულა 1-ის ჩემპიონი ალან ჯონსი 80 წლის ასაკში გარდაიცვალა

ალან ჯონსი, 1980 წლის ფორმულა 1-ის მსოფლიო ჩემპიონი, ხუთშაბათს გარდაიცვალა, 80 წლის იუბილედან რამდენიმე დღეში.

ის ფორმულა 1-ის ტიტულის მოგებული ბოლო ავსტრალიელია და სერ ჯეკ ბრებჰემის შემდეგ მხოლოდ მეორე ავსტრალიელი იყო, რომელმაც ჩემპიონობა მოიპოვა.

ჯონსის მეუღლემ, ამანდა ბატლერ-დეივისმა, განაცხადა: „ღრმად დამწუხრებულები ვართ, რომ ჩვენი საყვარელი ალანი გარდაიცვალა. ის 5 ნოემბერს, ხანმოკლე ავადმყოფობის შემდეგ გარდაიცვალა.

ის ძალიან მოენატრებათ და სიყვარულით გაიხსენებენ როგორც მის ახლობლებს, ისე მრავალ გულშემატკივარს, რომელთა მხარდაჭერასაც ყოველთვის აფასებდა.

ალანმა თავისი ცხოვრება ავტოსპორტს მიუძღვნა და მემკვიდრეობა შექმნა, რომელიც იმ უამრავი ადამიანის ცხოვრებაში გააგრძელებს არსებობას, ვისაც გზად შეეხო.

თავისი მიღწევებით, გატაცებითა და გამორჩეული ხასიათით, როგორც ტრასაზე, ისე მის მიღმა, ალანმა სპორტში წარუშლელი კვალი დატოვა როგორც ავსტრალიაში, ისე მთელ მსოფლიოში.

ოჯახის სახელით, გვინდა, ამ შესაძლებლობით ვისარგებლოთ და მადლობა გადავუხადოთ ყველას, ვინც ალანის გზის ნაწილი იყო, მრავალწლიანი მეგობრობისთვის, სიყვარულისა და მხარდაჭერისთვის. მას ძალიან გაუმართლა, რომ გარშემო ამდენი შესანიშნავი ადამიანი ჰყავდა.“

ჯონსი მელბურნში დაიბადა. მამამისი სარბოლო მძღოლი იყო. საკუთარი ამბიციების გასაფართოებლად ის ევროპაში გაემგზავრა და ფორმულა 1-ში დებიუტი 1975 წლის ესპანეთის გრან პრიზე, „ჰესკეთით“ (Hesketh) შედგა.

მან 12 გამარჯვებიდან პირველი 1977 წელს ავსტრიაში, „შედოუს“ (Shadow) გუნდთან ერთად მოიპოვა. თუმცა, კარიერის დიდი ნაწილი გამორჩეული შედეგების გარეშე გაატარა, სანამ 1978 წელს „უილიამსს“ (Williams) შეუერთდებოდა.

ჯონსმა 1980 წლის სეზონში მსოფლიო ჩემპიონატის ხუთი რბოლა მოიგო. დასრულებული რბოლებიდან მხოლოდ ერთში ვერ ავიდა კვარცხლბეკზე და ტიტული ბრაზილიელ ნელსონ პიკესთან ბრძოლაში მოიპოვა.

1981 წელს ტიტულის წარუმატებელი დაცვის შემდეგ, ის ავსტრალიაში დაბრუნდა და ფერმა იყიდა. ამას ხელი შეუწყო შინ მონატრებამ და ბრიტანული ამინდისადმი უარყოფითმა დამოკიდებულებამ.

მიუხედავად ამისა, ჯონსს მალე მობეზრდა მესაქონლის ახალი ცხოვრება. 1983 წელს ის ფორმულა 1-ს ერთჯერადად, „აროუსთან“ (Arrows) ერთად დაუბრუნდა, შემდეგ კი „ჰაასში“ (Haas) გადავიდა. ბოლიდი კონკურენტუნარიანი არ იყო. ჯონსის საუკეთესო შედეგი მეოთხე ადგილი აღმოჩნდა, რის შემდეგაც 1986 წელს ფორმულა 1-იდან კვლავ წავიდა.

ფორმულა 1-ის მიღმა, ჯონსმა 1978 წელს Can-Am-ის სპორტული ავტომობილების ჩემპიონატი მოიგო, ხოლო 1983 წელს მის ერთადერთ IndyCar-ის რბოლაში მესამე ადგილი დაიკავა. ის ავსტრალიის V8 Supercars-ის სერიაში 2002 წლამდე ასპარეზობდა, როცა 55 წლის იყო.