იტალიის საგარეო საქმეთა მინისტრი ჰაკერების თავდასხმებს გმობს

იტალიის საგარეო საქმეთა მინისტრის, ანტონიო ტაჯანის თქმით, ჰაკერები მას რამდენიმე დღეა ესხმიან თავს. მათ ბნელ ქსელში ტაჯანისა და მისი ოჯახის მგრძნობიარე პირადი მონაცემები გამოაქვეყნეს. ტაჯანიმ პლატფორმა X-ზე დაწერა: „ამის გამო ახალი მუქარებისა და დაშინების მცდელობების სამიზნე ვხდები. ისინი ჩემს ოჯახსაც ეხება და მზად არიან, ჩემ შესახებ და ჩემს ახლობლებზე დამატებითი ინფორმაციისთვის ფული გადაიხადონ“. მან ხაზი გაუსვა: „ჩემი პასუხი ძალიან მარტივია: ვერაფრით შემაშინებენ“. იტალიის მთავრობის მეთაურმა ჯორჯა მელონიმ თავდასხმებში პრორუსი ჰაკერები დაადანაშაულა.

ტაჯანი თავდასხმების მიზეზად რუსეთის მიერ თავდასხმის ქვეშ მყოფი უკრაინის მხარდაჭერას მიიჩნევს. მან დაწერა: „სუვერენული სახელმწიფოს თავისუფლების დაცვა და ქვეყნის დემოკრატიისა და დამოუკიდებლობის მკაფიო მხარდაჭერა ამ კრიმინალური ჯგუფებისთვის სახიფათოა“.

იტალიური ყოველდღიური გაზეთის, „ილ ფატო კოტიდიანოს“ ცნობით, ჰაკერული ჯგუფი „ნონეიმ057(16)“, რომელსაც, სავარაუდოდ, კავშირი აქვს რუსეთის სამხედრო დაზვერვასთან, გრუ-სთან, 26 ოქტომბრიდან 18 ადამიანის პაროლების, საცხოვრებელი მისამართების, რეზიუმეების, პირადი ტელეფონის ნომრებისა და სხვა პირადი მონაცემებისთვის ფულს სთავაზობდა. ჯგუფი ამ ადამიანებს რუსეთის მტრებად მოიხსენიებდა. სამიზნეებს შორის არიან ტაჯანი, იტალიელი პროკურორი ფრანჩესკო ლო ვოი, საფოსტო პოლიციის ხელმძღვანელი ივანო გაბრიელი და ავიანოს მერი პაოლო ტასან-ძანინი.

გერმანიის ფედერალური კრიმინალური პოლიციის სამსახურის, BKA-ს, 2025 წლის მონაცემებით, „ნონეიმ057(16)“ პრორუსული ჰაკერული ჯგუფია, რომელიც საჯაროდ ცნობილი გახდა უკრაინაში რუსეთის სრულმასშტაბიანი შეჭრის დაწყების შემდეგ, 2022 წლის თებერვალში. ჯგუფმა მხარდამჭერების გადაბირებაც დაიწყო. მათ პროგრამული უზრუნველყოფის ჩამოტვირთვას სთავაზობდნენ, რის შემდეგაც ისინი საკუთარი რესურსებით ე.წ. DDoS-თავდასხმებში მონაწილეობდნენ. ეს ვებსაიტების გადატვირთვის თავდასხმებია, რომელთა მიზანია, საიტები გარკვეული დროით მიუწვდომელი გახდეს.

2025 წლის ივლისში საერთაშორისო კოორდინაციით ჩატარებულმა პოლიციურმა და სასამართლო ოპერაციამ „ნონეიმ057(16)“-ის საინფორმაციო-ტექნოლოგიური ინფრასტრუქტურა და მსოფლიო ბოტნეტი გაანადგურა. ოპერაციას გერმანიის ფედერალური კრიმინალური პოლიციის სამსახური და ფრანკფურტის გენერალური პროკურატურა ხელმძღვანელობდნენ. თუმცა ჯგუფმა საქმიანობა ამის შემდეგაც განაგრძო.

იტალიური საინფორმაციო სააგენტო „ანსას“ ცნობით, ჰაკერული ჯგუფის სამიზნე გერმანიის მოქალაქეებიც და ერთი ავსტრიელიც გახდნენ. სააგენტოს მასალაში დასახელებული არიან ფრანკფურტელი პროკურორი, გერმანიის ფედერალური კრიმინალური პოლიციის სამსახურის პრეზიდენტი ჰოლგერ მიუნხი, გერმანელი ჟურნალისტი და ევროკავშირის სასამართლო ორგანო „ევროჯასტის“ ავსტრიელი პრეზიდენტი მიხაელ შმიდი. ამ ცნობების დადასტურება თავდაპირველად ვერ მოხერხდა.