აშშ-ში მონაცემთა ცენტრების მოთხოვნა წიაღისეული საწვავის მილსადენების პროექტებს ზრდის

ანგარიშის თანახმად, პროექტების 25%-ზე მეტმა დაჩქარებული გარემოსდაცვითი შეფასება მოითხოვა. ადმინისტრაცია მათ დასამტკიცებლად ძირითადად სამართლებრივად საეჭვო მექანიზმებს იყენებს, მათ შორის „ენერგეტიკული საგანგებო მდგომარეობის“ გამოცხადებას. ანგარიშში ნათქვამია, რომ ამან ნებართვების დამტკიცება დააჩქარა, გარემოზე კვლევების მასშტაბი შეამცირა და საზოგადოების მონაწილეობა შეზღუდა.

ამასობაში, ადმინისტრაციამ თავდაცვის წარმოების შესახებ კანონი გამოიყენა შტატების წინააღმდეგობის მიუხედავად პროექტების გასატარებლად. მარტში მან კალიფორნიის ქალაქ სანტა ბარბარაში სანტა ინესის ნავთობსადენის ამოქმედებას შეუწყო ხელი. შტატმა ის 2015 წელს, დიდი გაჟონვის შემდეგ დახურა. გაჟონვამ სანაპირო ზოლის დაახლოებით 150 მილი (240 კმ) დააზიანა.

იმავე კანონის გამოყენებით ცდილობენ, ძალით გაატარონ სადავო გეგმა კონსტიტუციის 125-მილიანი (200 კმ) მილსადენის ასაშენებლად. ის პენსილვანიიდან ნიუ-იორკის შტატის ჩრდილოეთ ნაწილამდე უნდა მივიდეს, რასაც ნიუ-იორკი ეწინააღმდეგება.

ტრამპის ადმინისტრაციამ იანვარში მემორანდუმი გამოსცა. მასში ნათქვამია, რომ ის თავს შეიკავებს იმ კომპანიების წინააღმდეგ აღსრულების ზომების მიღებისგან, რომლებიც მილსადენებისა და საშიში მასალების უსაფრთხოების ადმინისტრაციის რეგულაციებს დაარღვევენ.

2025 წლისთვის ადმინისტრაციამ უკვე გაანახევრა დაწყებული აღსრულების ზომების საშუალო რაოდენობა და მხოლოდ 117 ასეთი შემთხვევა დააფიქსირა.

ანგარიშის თანახმად, ადმინისტრაცია ავარიებისა და აფეთქებების რისკსაც ზრდის. ის კომპანიებს მჭიდროდ დასახლებულ ადგილებში მილსადენებში წნევის მომატების უფლებას აძლევს და მათ ნაკლები წნევის ტესტის ჩატარების საშუალებას აძლევს.

ადმინისტრაციამ ეს ცვლილებები ავარიების ხშირი შემთხვევების მიუხედავად განახორციელა, მათ შორის მაშინაც, როცა ავარიებს მსხვერპლი მოჰყვა. ანგარიშში მოყვანილია 2023 წლის მარტის კატასტროფა პენსილვანიის ქალაქ ვესტ რიდინგში. გაზსადენში გაჩენილმა ბზარმა შოკოლადის ქარხანაში აფეთქება გამოიწვია. დაიღუპა შვიდი მუშა, 10 კი დაშავდა.

გასულ თვეში ნიუ-მექსიკოში მილსადენის აფეთქების შედეგად ორი მუშა დაიღუპა.

მილსადენებმა შესაძლოა ფედერალური დაცვის ქვეშ მყოფი ჭაობების ათასობით აკრიც გაანადგუროს. ანგარიშის თანახმად, სულ მცირე 81 პროექტი 19 000 აკრზე (7 700 ჰექტარზე) მეტ ასეთ ჭაობს დააზიანებს.

ეს იმ დროს ხდება, როცა ტრამპის ადმინისტრაცია ფედერალური დაცვის ქვეშ მყოფი ჭაობების 94%-ის დაცვის გაუქმებას ცდილობს.

ამ საფრთხის შედეგებს განსაკუთრებით სამხრეთ-დასავლეთ ლუიზიანაში გრძნობენ. მის ტერიტორიაზე ბევრი მილსადენია, რადგან მდინარე მისისიპის გასწვრივ ექსპორტის ტერმინალები მრავლადაა. ეს მილსადენები უკვე კვეთს და აზიანებს მოწყვლად ჭაობებსა და სათევზაო ადგილებს, განაცხადა ორგანიზაცია „უკეთესი ბაიუსთვის“ (For a Better Bayou) აღმასრულებელმა დირექტორმა ჯეიმს ჰაიატმა.

„აქ მცხოვრები ადამიანები რისკებს საკუთარ თავზე იღებენ და ტვირთს ზიდავენ, მოგება კი სხვაგან მიდის“, თქვა ჰაიატმა.

თემებიალექსანდრა შეიკევიჩიდონალდ ტრამპიჯეიმს ჰაიატიგარემოსდაცვითი მთლიანობის პროექტიმილსადენებისა და საშიში მასალების უსაფრთხოების ადმინისტრაციაუკეთესი ბაიუსთვისკონსტიტუციის მილსადენისანტა ინესის ნავთობსადენი

გამოქვეყნდა 8 ნოემბერი, 2026