პარაგვაის გადაყენებული პრეზიდენტი შინაპატიმრობაშია

პარაგვაის მემარჯვენე პრეზიდენტი კონგრესის მიერ იმპიჩმენტის გამოცხადებიდან რამდენიმე წუთში შინაპატიმრობაში მოათავსეს. ეს მძიმე კრიზისის ფონზე მოხდა, რომელმაც ქვეყნის მოსახლეობის ნახევარზე მეტს საბანკო ანგარიშებზე წვდომა შეუზღუდა.

სანტიაგო პენიას იძიებენ იმ ბრალდებებთან დაკავშირებით, რომ მან პოლიტიკური გავლენა გამოიყენა იმ ბანკის სასარგებლოდ, რომელიც მისი მთავრობის დროს სწრაფად გაიზარდა და ამ კვირაში დარღვევების გამო შეაჩერეს.

ამ ნაბიჯმა 2,9 მილიონი ადამიანის, ქვეყნის ზრდასრული მოსახლეობის დაახლოებით 60%-ის ანგარიშები გაყინა. ისინი ბანკ „უენოს“ (Ueno) კლიენტები იყვნენ და ერთ ღამეში საკუთარი ფულის გამოყენება ვეღარ შეძლეს, მათ შორის პურისა და წყლის საყიდლად.

ქვეყნის მასშტაბით საპროტესტო გამოსვლები გაიმართა, ზოგან პოლიციასთან ძალადობრივი შეტაკებებიც მოხდა. იმპიჩმენტის პროცესი ოთხშაბათს დაიწყო და პარასკევს დასრულდა, პენიას დაკავების ბრძანების გაცემამდე რამდენიმე წუთით ადრე.

მისი ვიცე-პრეზიდენტი, პედრო ალიანა, ქვეყნის ახალ ლიდერად ფიცს დებდა, როდესაც პროკურორი, რომელიც პენიას სახლთან პოლიციასთან ერთად იმყოფებოდა, ადგილობრივ მედიას განუცხადა, რომ ყოფილი პრეზიდენტი შინაპატიმრობაში მოათავსეს.

პროკურორმა ელენა ფიორე ფრანკომ განაცხადა: „დადგინდა, რომ ის ნამდვილად სახლში იმყოფება. მან ნებაყოფლობით მისცა პოლიციელებს სახლში შესვლის უფლება და ყველა საპროცესო მიზნისთვის მზადყოფნა გამოთქვა“.

პროკურატურამ პენიას წინააღმდეგ ხუთშაბათს დაიწყო გამოძიება უკანონო გამდიდრების, ფულის გათეთრებისა და გავლენით ვაჭრობის ეჭვის საფუძველზე.

პენია, რომელიც აშშ-ის პრეზიდენტ დონალდ ტრამპის ერთ-ერთი მთავარი მოკავშირე იყო რეგიონში, ხუთშაბათს გადადგომას ცდილობდა. ამით მას ყოფილი პრეზიდენტებისთვის მინიჭებული განსაკუთრებული იურისდიქციის შენარჩუნება სურდა. პარაგვაიში ყოფილი პრეზიდენტები უვადო სენატორები ხდებიან, თუმცა დეპუტატებმა მისი გადადგომა არ მიიღეს და ის ჩვეულებრივი სასამართლოების განსჯადი გახდა.

გავრცელებული ხმების ფონზე, თითქოს ის არგენტინაში გაიქცა, 47 წლის ეკონომისტი იმპიჩმენტის პროცესზე კონგრესის წინაშე საკუთარი დაცვის წარსადგენად უნდა გამოცხადებულიყო. თუმცა ეს საქმე თავის ადვოკატებს მიანდო და სოციალურ ქსელებში პოსტების გამოქვეყნება განაგრძო.

იმპიჩმენტის დასრულებამდე და დაკავების ორდერის გაცემამდე მან დაწერა: „მადლიერებით გემშვიდობებით და სრულად ვაცნობიერებ იმ ადამიანების გულისტკივილს, რომლებიც ახლა პასუხებს ელიან“. ის „უენოს“ ყოფილ კლიენტებს გულისხმობდა, რომლებსაც საკუთარ ფულზე წვდომა აღარ ჰქონდათ.