კანადას ევროკავშირთან „უნიკალური ალიანსის“ შექმნა სურს

აშშ-სთან სავაჭრო დავის გამწვავების ფონზე, კანადა ევროკავშირს უფრო მეტად უახლოვდება. პრემიერ-მინისტრმა მარკ კარნიმ კვირა საღამოს ტორონტოში განაცხადა, რომ მის ქვეყანას ევროკავშირთან „უნიკალური ალიანსის“ შექმნა სურს. კარნიმ თქვა: „ჩვენ ერთნაირი ღირებულებები და პრიორიტეტები გვაქვს. ამასთან, ჩვენი ძლიერი მხარეები ერთმანეთს დიდწილად ავსებს“.

კარნი შაბათს უოლ-სტრიტ ჯორნალში (Wall Street Journal) გამოქვეყნებულ ცნობას გამოეხმაურა. გაზეთმა ევროკავშირისა და კანადის წარმომადგენლებზე დაყრდნობით დაწერა, რომ კარნი „ევროკავშირთან ასოცირებული წევრობის“ შესაძლებლობას განიხილავს. გამოცემის ცნობით, ევროკავშირიც მზადაა, ეს შესაძლებლობა განიხილოს. ამავე ცნობით, კანადელი და ევროპელი ოფიციალური პირები საკითხზე რამდენიმე თვეა საუბრობენ.

უოლ-სტრიტ ჯორნალის ცნობით, მხარეები, მათ შორის, ევროპულ ერთიან ბაზართან კანადის დაკავშირების გზებს განიხილავენ. საუბარია ენერგეტიკაზე, ხელოვნურ ინტელექტზე, თავდაცვასა და კრიტიკულად მნიშვნელოვან მინერალებზე. ამის შემდეგ ამ დარგების საქონელი, მომსახურება და სამუშაო ძალა ევროპასა და კანადას შორის შეუფერხებლად გადაადგილდებოდა. თუმცა კარნიმ უარყო, რომ კანადა ევროკავშირში გაწევრებას ცდილობს. პრემიერ-მინისტრმა თქვა: „ჩვენ ევროკავშირის წევრობა არ გვსურს“.

აშშ-ის პრეზიდენტის, დონალდ ტრამპის, თანამდებობაზე მოსვლიდან დაახლოებით წელიწად-ნახევარი გავიდა. ამ პერიოდში მჭიდროდ დაკავშირებულ მეზობლებს, კანადასა და აშშ-ს, შორის სავაჭრო კონფლიქტი მიმდინარეობს. ბოლო დროს ის ტარიფებისა და საპასუხო ტარიფების დაწესებით გამწვავდა.

ექსპერტები თანხმდებიან, რომ სავაჭრო კონფლიქტის შედეგებით ორივე ქვეყანა ზარალდება. თუმცა მისი გავლენა ბევრად მცირე ეკონომიკის მქონე კანადისთვის გაცილებით საგრძნობია, ვიდრე აშშ-სთვის. კანადაში კარნის ტრამპის კურსზე რეაგირებას ფართოდ უჭერენ მხარს. იქ ბევრი ადამიანი ტრამპის კურსს არათანმიმდევრულად და უსამართლოდ მიიჩნევს.

პრემიერ-მინისტრი ამ კვირაში ევროპაში მიემგზავრება. კარნი, სხვა ღონისძიებებთან ერთად, ხუთშაბათს ევროპარლამენტში სიტყვით უნდა გამოვიდეს. ევროკავშირი აშშ-ის შემდეგ კანადის სიდიდით მეორე სავაჭრო პარტნიორია.