კლუბების ხელმძღვანელები მანჩესტერ სიტის ამ სეზონში დასჯას ითხოვენ

პრემიერ-ლიგამ (Premier League) სამშაბათს განაცხადა, რომ მანჩესტერ სიტი დამნაშავედ ცნეს ყველა ბრალდებაში. ისინი 2009-10-დან 2017-18 წლების სეზონამდე ფინანსური რეგულაციების დარღვევას ეხებოდა.

ბრალდებები მოიცავდა მოჩვენებითი სასპონსორო გარიგებებით შემოსავლის ხელოვნურად, 900 მილიონ ფუნტზე მეტით გაზრდას.

მანჩესტერ სიტიმ ბრალდებები არაერთხელ უარყო და მიანიშნა, რომ ამ კვირის ბოლომდე გასაჩივრებას აპირებს.

შეშფოთებას იწვევს, რომ პროცესი, რომელიც ბრალის წარდგენიდან სამი წელი გაგრძელდა, შესაძლოა გაცილებით უფრო გაიწელოს.

თუმცა, ფეხბურთის გავლენიანმა წარმომადგენლებმა ბი-ბი-სი სპორტს უთხრეს, რომ საქმის ამ სეზონის ბოლომდე დასრულებას ხელს არაფერი უშლის.

კლუბის ერთ-ერთმა წარმომადგენელმა ანონიმურობის პირობით განაცხადა: „საქმის რაც შეიძლება სწრაფად გადაწყვეტა ყველასთვის სასარგებლოა“.

კითხვაზე, ელოდა თუ არა საქმის სწრაფად დასრულებას, წარმომადგენელმა უპასუხა: „ინტუიციურად, დიახ, მაგრამ ყველაფერი სწორად უნდა გაკეთდეს.

„ყველა ვხედავთ, რა რისკები წარმოიქმნება, თუ ასე არ მოხდება. თუმცა, ეს რისკები მთელი პროცესის განმავლობაში არსებობდა, რადგან ამ პერიოდში მათ ლიგა რამდენჯერმე მოიგეს“.

სისხლის სამართლის გამოძიება? დაქვეითება თუ გარიცხვა? მთავარი კითხვები მანჩესტერ სიტის შესახებ

ბერნემი მანჩესტერ სიტის მფლობელების შესაძლო წასვლით „ძალიან შეშფოთებულია“

კიდევ ერთმა წყარომ თქვა, რომ პროცესი სეზონის ბოლომდე უნდა დასრულდეს. წყარომ იმედი გამოთქვა, რომ ნებისმიერი გასაჩივრების ვადა შემცირდება.

საბოლოო გადაწყვეტილებას დამოუკიდებელი კომისია იღებს. კომისიის გადაწყვეტილებამდე პრემიერ-ლიგის საბჭოსა და მანჩესტერ სიტის სათანადო სასჯელის შეთავაზება შეუძლიათ.

საქმის სეზონის ბოლომდე დასრულების სურვილი სულ უფრო ძლიერდება. მანჩესტერ სიტის დაუსჯელად სეზონის ბოლომდე მისვლამ შესაძლოა გაურკვევლობა და ფარსი გამოიწვიოს, განსაკუთრებით გუნდის ჩემპიონობის შემთხვევაში.

პრემიერ-ლიგის რეგულაციების ერთ-ერთი მუხლის თანახმად, გასაჩივრება მისი წარდგენიდან არაუმეტეს 12 კვირაში უნდა დასრულდეს. გადაწყვეტილება პროცესის დასრულებიდან 30 დღეში უნდა მიიღონ, თუმცა გაურკვეველია, გავრცელდება თუ არა ეს მანჩესტერ სიტის საქმეზე.

კონკრეტული ვადების დასაცავად, მაგალითად, ლიგის სეზონის ბოლომდე, პროცედურები შეიძლება დაჩქარდეს.

თუმცა, კლუბის აღმასრულებელმა დირექტორმა ფერან სორიანომ მიანიშნა, რომ საქმე დიდხანს გაგრძელდება.