LG-მ სმარტტელევიზორებით თვალთვალის ბრალდებებს უპასუხა

ტელევიზორების მწარმოებელმა LG-მ Gamers Nexus-ის მიერ კომპანიის სმარტტელევიზორებზე ჩატარებულ კვლევებს უპასუხა. კომპანიამ შინაარსის ავტომატური ამოცნობის, ACR-ის (Automatic Content Recognition), მუშაობა ვრცლად განმარტა.

LG-ის განცხადება თავდაცვითია და ზოგან დამაჯერებლობას მოკლებულია. კომპანია Gamers Nexus-ის მკვლევრების ბრალდებებს ბევრგან პირდაპირ არ პასუხობს, რაც ინტერპრეტაციის შესაძლებლობას ტოვებს.

თუმცა განმარტებები აჩვენებს, როგორ მუშაობს დღეს ტელევიზორში რეკლამა, არა მხოლოდ LG-ის მოწყობილობებში. LG-ის თქმით, ACR მხოლოდ ხმის მოკლე მონაკვეთებს იყენებს და ვიდეოჩანაწერებს არ იღებს. შესაძლოა, Gamers Nexus-ის მკვლევრები შეცდნენ, როცა განაცხადეს, რომ ტელევიზორი ეკრანის სურათებსაც იღებს. კომპანიამ განმარტა, რომ მოწყობილობა ხმოვან მონაკვეთებს შიდა აუდიოპროცესორით და არა დინამიკით ამუშავებს.

თუმცა მკვლევრებს დინამიკი არ უხსენებიათ. მათი თქმით, ტელევიზორი ხმოვან მონაცემებს ჰეშებად ამუშავებს და გზავნის. ეს მოკლე ტექსტური ფრაგმენტები დაფიქსირებულ შინაარსს აღნიშნავს და დიდ ეკრანზე ნაჩვენები მასალის ამოცნობის საშუალებას იძლევა.

ხმოვანი მართვა მხოლოდ მაშინ აქტიურდება, როცა მომხმარებელი დისტანციური მართვის პულტზე მიკროფონის ღილაკს აჭერს ან ტელევიზორში ჩაშენებულ მიკროფონს რთავს. მთავარი საკითხი ჩაწერის ხანგრძლივობაა. Gamers Nexus-მა პერიოდი 10-დან 15 წამამდე განსაზღვრა, LG-მ კი 18 წამამდე დაყოვნება აღიარა. ხმოვანი ბრძანების გარეშე სესია „Hi LG“-ის წარმოთქმიდან ან მიკროფონის ღილაკზე დაჭერიდან 10 წამში სრულდება.

LG-მ განაცხადა: „ტელევიზორი სახლში საუბრებს უწყვეტად არ უსმენს, არ იწერს და არ ინახავს“. თუმცა ხმოვანი მართვის ჩართვისას ტელევიზორი მოლოდინის რეჟიმშიც აკუსტიკურად აკვირდება ოთახს. LG-ის განმარტებით, აქტივაციის სიტყვის ამოსაცნობ ჩანაწერებს მოწყობილობა ადგილობრივად ამუშავებს, დაუყოვნებლივ შლის და კომპანიას არ უგზავნის. მკვლევრებმა ექსპერიმენტებში განსხვავებული შედეგი აჩვენეს. რომელი ვერსიაა სწორი, უცნობია.

Gamers Nexus-ის თქმით, ინტერნეტთან ხელახლა დაკავშირებისას ტელევიზორი ACR-ის მონაცემებს გზავნის. LG კი ამბობს, რომ ხმოვანი მონაცემები მოგვიანებით ასატვირთად არ ინახება. ეს ფორმულირება ხმოვანი მონაცემებისგან ACR-ისთვის შექმნილ ჰეშებს არ მოიცავს.

LG-მ გარემოში მიმდინარე საუბრების ჩაწერის ბრალდებაც არადამაჯერებლად უარყო. კომპანიის თქმით, ხმოვანი ამოცნობის სესიის დროს ახლოს წარმოთქმული საუბარი შეიძლება შედეგებში მოხვდეს. თუმცა ასეთი ჩანაწერები მხოლოდ კონკრეტულ ხმოვან ბრძანებას უკავშირდება და უწყვეტ ჩაწერას არ ადასტურებს.

Gamers Nexus-მა გაფრთხილება შესაძლო საფრთხეებზეც გააკეთა, მაგალითად, თუ თავდამსხმელები ტელევიზორს გატეხავენ. LG-მ აღნიშნა, რომ ქსელთან დაკავშირებული არცერთი პროდუქტი უსაფრთხოების ხარვეზებისგან სრულად დაცული ვერ იქნება. თუმცა ACR-ის ფუნქცია სმარტტელევიზორებზე თავდასხმის ფართო შესაძლებლობას ქმნის.