მასტანტუონომ ჰეთ-თრიკით მესის რეკორდი გააუმჯობესა

რეალ მადრიდიდან იჯარით გადასულმა გარემარბმა ფრანკო მასტანტუონომ ლიონელ მესის რეკორდი გააუმჯობესა. ის ევროპის ხუთ წამყვან ლიგაში ჰეთ-თრიკის შემსრულებელი ყველაზე ახალგაზრდა არგენტინელი გახდა. მასტანტუონომ პარასკევს ფიორენტინას შემადგენლობაში ვენეციასთან 4:2 გამარჯვებისას სამი გოლი გაიტანა.

მასტანტუონო 19 წლისა და 28 დღისაა. ის 231 დღით უმცროსია, ვიდრე მესი 2007 წლის 10 მარტს იყო, როცა ბარსელონას შემადგენლობაში პირველი ჰეთ-თრიკი რეალ მადრიდთან შეასრულა.

პარასკევს გატანილი გოლები მასტანტუონოსთვის ფიორენტინას შემადგენლობაში პირველი იყო. ის მადრიდიდან იტალიურ კლუბს გასულ თვეში ერთსეზონიანი იჯარით შეუერთდა. ამ გამარჯვებით ფიორენტინამ სეზონში პირველი ქულები მოიპოვა.

ჰეთ-თრიკით არგენტინის ნაკრების ფეხბურთელმა იმავე რაოდენობის გოლი დააგროვა, რამდენიც გასულ სეზონში ესპანური გრანდის მაისურით 35 მატჩში გაიტანა.

ვენეციას სერია A-ს პირველი სამი მატჩიც წაგებული ჰქონდა, თუმცა ამ შეხვედრაში ანგარიში თავად გახსნა. ამერიკელი ნახევარმცველის, ჯანლუკა ბუზიოს კარგი შეტევის შემდეგ აკორ ადამსმა 22-ე წუთზე მარჯვენა ფეხით ზუსტად დაარტყა.

თუმცა, ნახევარსაათიან ნიშნულზე მასტანტუონომ ერთი წუთისა და 38 წამის განმავლობაში ორი გოლი გაიტანა. შედეგად, ფიორენტინა შესვენებაზე დაწინაურდა. მასტანტუონო ასევე ფიორენტინას ყველაზე ახალგაზრდა ფეხბურთელი გახდა, რომელმაც ერთ მატჩში ერთზე მეტი გოლი გაიტანა.

მეორე ტაიმის შუაში მატეო პელეგრინომ ანგარიში 3:1 გახადა. ეს მისთვის ორ მატჩში მეორე გოლი იყო. მასტანტუონომ ჰეთ-თრიკი ძირითადი დროის დასრულებამდე ექვსი წუთით ადრე შეასრულა.

ანტუან ენომ ვენეციას მეორე გოლი მატჩის მიწურულს გაიტანა. მარცხის შემდეგ გუნდი უქულოდ დარჩა და 20-გუნდიანი ცხრილის ბოლო ადგილზეა. ფიორენტინა მე-15 ადგილზე გადავიდა.

მასტანტუონომ თავი რივერ პლეიტში გამოიჩინა, სადაც მთავარ გუნდში დებიუტი 16 წლის ასაკში ჰქონდა. 2025 წლის ივნისში ის არგენტინის ნაკრების ისტორიაში ყველაზე ახალგაზრდა ფეხბურთელი გახდა.

2025 წლის ივნისში, როცა მასტანტუონომ რივერ პლეიტიდან მადრიდულ კლუბთან ექვსწლიანი კონტრაქტი გააფორმა, ის მსოფლიო ფეხბურთის ერთ-ერთი ყველაზე მოთხოვნადი ახალგაზრდა ტალანტი იყო. რეალ მადრიდმა მისთვის ბრძოლაში პარი სენ-ჟერმენს აჯობა.

თუმცა, გასულ სეზონში მას ესპანეთში გაუჭირდა და ბერნაბეუზე მნიშვნელოვანი გავლენა ვერ მოახდინა. მასტანტუონო არგენტინის მსოფლიო ჩემპიონატის განაცხადშიც ვერ მოხვდა.